Արդյունք կտա ցանկացած միջոց

Հանրային ծառայությունները կարգավորող հանձնաժողովը հուլիսի 1-ին կայացած նիստում որոշում ընդունեց էլեկտրաէներգիայի թանկացման մասին: Այն նախատեսվածի համաձայն օգոստոսի 1-ից կդառնա 41 դրամ:

«Սպառողների միություն» ՀԿ-ի նախագահ Արմեն Պողոսյանը ողջունում է էլեկտրաէներգիայի թանկացման դեմ պայքարի տարբեր միջոցները՝ բողոքի ակցիաները, լույսերն անջատելը, լույսի գումարը չվճարելը և այլն:

«Հասարակական կարծիքից վախենում է նույնիսկ նա, ով ոչնչից չի վախենում»,- Լուրեր.com-ի հետ զրույցում, մեջբերելով Նապոլեոն Բոնապարտի խոսքը, ասաց Արմեն Պողոսյանը:

Սակայն վերջինս ունի մեկ մտահոգություն՝ պայքարը խումբ-խումբ է իրականացվում:

«Մարդիկ ազնիվ մղումներով, ջերմեռանդ մի ինչ-որ ակցիայի են մասնակցում, մեկ այլ խումբ մեկ այլ ակցիայի է մասնակցում, մի խումբը գնում է շուկան փրկելու, մյուս խումբը ցույց է անում տրանսպորտի գնի դեմ, մյուս խումբը ցույց է անում էլեկտրաէներգիայի թանկացման դեմ: Բայց մի խումբը մյուսին չի էլ հավանում ու չի ցանկանում համատեղ գործել: Ես չգիտեմ՝ դա ոնց է բուժվելու, բայց դա մեր հասարակության ցավն է: Եվ մեկը մյուսին կասկածանքներով է մոտենում, թե նրանք ում կողմից են ղեկավարվում»,- ասաց Պողոսյանը՝ հավելելով, որ ինքն այդ մոտեցումը մերժում է:

«Ենթադրենք՝ ես ուղարկված եմ Կրեմլից, ի՞նչ կապ ունի, եթե խումբը գնում է փրկելու շուկան, ի՞նչ կապ ունի, թե ով ում կողմից է կերակրվում: Պետք է կարողանանք դա հաղթահարել դա: Երեկվա ակցիային 100 մարդ էր, բայց պետք է լիներ 30 000-ը»,- ասաց Պողոսյանը: