ՕԵԿ-ն Ազատության հրապարակում համազգային հանրահավաք է հրավիրել

«Օրինաց երկիր» կուսակցությունը անընդունելի է գնահատում էլեկտրաէներգիայի սակագինը բարձրացնելու մասին որոշումը ներկա սոցիալ-տնտեսական ծանր պայմաններում: Հուլիսի 2-ին տեղի է ունեցել «Օրինաց երկիր» կուսակցության քաղաքական խորհրդի նիստը, որը վարել է կուսակցության նախագահ Արթուր Բաղդասարյանը:

Քաղաքական խորհուրդը քննարկել է Հայաստանի ներքին և արտաքին քաղաքական օրակարգը, կուսակցության կազմակերպչական գործունեությանն անչվող հարցեր: Նիստի ժամանակ անդրադարձել է կատարվել նաև ՀՀ Հանրային ծառայությունները կարգավորող հանձնաժողովի' օգոստոսի մեկից էլեկտրաէներգիայի սակագինը բարձրացնելու մասին որոշմանը: Արձանագրվել է, որ Ազգային ժողովի կողմից տվյալ հարցի կապակցությամբ անցկացված խորհրդարանական լսումների արդյունքները, Ազգային ժողովի ժամանակավոր հանձնաժողովի եզրակացությունը, ինչպես նաև հուլիսի 1-ին Հանրային ծառայությունները կարգավորող հանձնաժողովի նիստում հանձնաժողովի անդամների ներկայացրած փաստարկները և նույն նիստին մասնակցող քաղաքական ուժերի և հասարակական կազմակերպությունների ներկայացուցիչների հակափաստարկները վկայում են ընդունված որոշման չհիմնավորվածության մասին:

Հաշվի առնելով վերը շարադրվածը' ՕԵԿ-ը համապատասխան հայցադիմում է ներկայացրել Վարչական դատարան' վիճարկելու նաև էլեկտրաէներգիայի և գազի գործող սակագները:

Քաղաքական խորհուրդը որոշում է կայացրել հուլիսի 18-ին Ազատության հրապարակում հրավիրել համազգային հանրահավաք' ընդդեմ էլեկտրաէներգիայի սակագնի բարձրացման:

Երևանի քաղաքապետարանը հանրահավաքի անցկացման մասին օրենքով սահմանված կարգով կիրազեկվի: