Մի խումբ հայաստանցի զբոսաշրջիկներ հեթանոսական ծիսակատարություն են իրականացրել Նեմրութ սարի վրա

Հայաստանցի մի խումբ զբոսաշրջիկներ բարձրացել և արևածագը դիտել են Թուրքիայի տարածքում գտնվող Նեմրութ սարի վրա: Այս մասին տեղեկացնում է թուրքական Haberler.com-ը: 2 206 մետր բարձրությունը հաղթահարած զբոսաշրջիկները, որոնց թվում եղել են նաև հեթանոսներ, ինչպես նաև հայստանյան խմբին միացած տեղացի հայեր, արևածագը միասին դիմավորելուց հետո հեթանոսական ծիսակատարություն են իրականացրել Նեմրութի գագաթին:

Արարողությանը մասնակցող Գագիկ Հայրապետյանն ասել է, որ իրենց համար Նեմրութն ու Վանը սուրբ վայրեր են: Ընդգծելով, որ Նեմրութի սարը խորհրդանշում է խաղաղություն, նա նշել է. «Ցանկանում ենք ամեն տարի գալ այստեղ: Մեր մեջ կան թանգարանի աշխատակիցներ, գործարարներ, գրողներ, բժիշկներ և զինվորականներ: Մենք խաղաղություն ենք ցանկանում ողջ մարդկության համար»,- ասել է Հայրապետյանը:

Նեմրութի սարը գտնվում է ժամանակակից Թուրքիայի տարածքում: Սարի վրա է գտնվում Անտիոքոս Ա Երվանդունի թագավորի կառուցած դամբարանաբլուր-սրբավայրը, որի արևելյան և արևմտյան կողմերի արհեստական հարթակներին դրված են արձաններ, բարձրաքանդակներով ու արձանագրություններով այլ կոթողներ։