Բրազիլիայի Սալվադոր քաղաքում բացվել է ֆուտբոլի աշխարհի առաջնությունների մարզաշապիկների ցուցահանդես

Բրազիլացի կոլեկցիոներ Դուդա Սամպայոն Բաիյա նահանգի կառավարությանը հանձնել է 111 ֆուտբոլային մարզաշապիկ՝ Սալվադորում ցուցահանդես կազմակերպելու համար, որն արտացոլում է ֆուտբոլի աշխարհի առաջնությունների պատմությունը: Ինչպես տեղեկացնում է «Արմենպրես»-ը, նահանգի մայրաքաղաքի խոշորագույն առևտրական կենտրոնում տեղակայված է 19 ստենդ (արդեն անցկացված մրցաշարերի քանակով), որոնցից յուրաքանչյուրի վրա ցուցադրված է 6-7-ական ֆուտբոլկա:

Ցուցահանդեսում ներկայացված մարզաշապիկների ճնշող մեծամասնությունը ֆուտբոլիստներն օգտագործել են հենց մրցաշարերում: Նորերի թվում են միայն մի քանիսը, որոնք առավելապես վերաբերում են առաջին մրցաշարերին: Օրինակ, աշխարհում գոյություն չունի 1930 թվականի աշխարհի առաջնությունում Բոլիվիայի հավաքականի իսկական մարզահագուստը, ինչպես նաև չեն պահպանվել Գերմանիայի թիմի խաղացողների ֆուտբոլկաները, որոնցով նրանք հանդես են եկել 1938 թվականի մրցաշարում:

Սկզբում Դուդու Սամպայոն հավաքում էր բացառապես Բրազիլիայի հավաքականի և տեղական ակումբների մարզաշապիկները, սակայն հետո իր հոբբիի «սահմաններն ընդլայնել է»: Ներկայում նրա հավաքածուն ներառում է մոտավորապես 3400 նմուշ, որոնցից ամենաթանկը բրազիլացի Դիրսեուի ֆուտբոլկան է, որը համաշխարհային երեք առաջնությունների (1974, 1978, 1982) մասնակից է: Դրա համար նա վճարել է 4 հազար ռեալ (1,8 հազար դոլար):

Կոլեկցիոների հաշվարկներով՝ ցուցահանդեսում ներկայացված ֆուտբոլկաների արժեքը կազմում է 35 հազար ռեալ (15,7 հազար դոլար), հաղորդել է ԻՏԱՌ-ՏԱՍՍ-ը: