Հայաստան մուտք գործեց արաբական ազգային ավիափոխադրող «Էթիհադ Էյրվեյզ» ավիաընկերությունը

Արաբական Միացյալ Էմիրությունների ազգային ավիափոխադրող «Էթիհադ Էյրվեյզ» ավիաընկերության մուտքը Հայաստան կարող է նպաստել ներգնա զբոսաշրջության զարգացմանը, կխթանի տնտեսական և առևտրային կապերն ԱՄԷ-ի և Հայաստանի միջև: Ավիաընկերությունն այսուհետ շաբաթական չորս անգամ թռիչքներ կիրականացնի Աբու Դաբի-Երևան-Աբու Դաբի ուղղությամբ: Ուղևափոխադրումների շաբաթական ծավալը կհասնի 1088-ի: Ավիաընկերության առաջին չվերթը կայացել է այսօր առավոտյան: Այս մասին լրագրողների հետ հանդիպմանը նշեց ավիաընկերության վաճառքի գծով ավագ փոխնախագահ Ջեյմս Մյուլերը: «Աբու Դաբի-Երևան նոր երթուղին սպասարկվելու է երկրորդ դասի «A320 Airbus» օդանավի միջոցով: Օդանավը նախատեսված է 136 ուղևորի, այդ թվում՝ բիզնես-դասի 16 և էկոնոմ-դասի 120 ուղևորի համար: Ուղևորափոխադրումների շաբաթական ծավալը կհասնի 1088-ի: Բեռների համար կունենանք շատ մեծ տարածքներ: Հայաստանը մեզ համար նոր շուկա է, և մենք ուրախ ենք, որ ներկայություն ենք հաստատել այստեղ»,- ասաց նա:

Մյուլերի խոսքով` նոր թռիչքները նպատակաուղղված են ԱՄԷ-ի և Հայաստանի միջև առկա մեծածավալ և աճող պահանջարկի բավարարմանը, ինչպես նաև աշխարհի տարբեր պետությունների հայաշատ` հատկապես 1.5 միլիոնանոց հայկական սփյուռք ունեցող ԱՄՆ-ի քաղաքների համար: Ներկայումս Աբու Դաբիից ամենօրյա թռիչքներ են իրականցվում Լոս Անջելես, Չիկագո և Վաշինգթոն, օրական երկուական թռիչքներ` Նյու Յորք, իսկ դեկտմբերից ուղիղ չվերթներ կիրականացվեն Դալաս:

Հայաստանի ազգային մրցունակության հիմնադրամի գործադիր տնօրեն Արման Խաչատրյանը նշեց, որ ՀՀ կառավարության կողմից որդեգրվել է բաց երկնքի քաղաքականությունը, որի շրջանակներում վերացվել են նախկինում շուկայում գործող բոլոր սահմանափակումները:

«Բաց երկնքի քաղաքականության արդյունքներն արդեն տեսանելի են ավիաթռիքչների, ուղևորափոխադրումների աճի, գների նվազման, սպասարկման աշխարհագրության տեսանկյունից և այլն: Այս առումով ողջունում եմ աշխարհի խոշորագույն և լավագույն ավիաընկերություններից մեկի մուտքը հայկական շուկա: Առաջին հերթին, սա ընկերության վստահությունն է ՀՀ կառավարության կողմից որդեգրված քաղաքականության նկատմամբ, մյուս կողմից՝ պատրաստակամությունը՝ ծավալել ռազմավարական ու երկարաժամկետ գործունեություն այստեղ»,- շեշտեց նա:

Գնային քաղաքականություն վերաբերյալ լրագրողների հարցին` Ջեյմս Մյուլերը պատասխանեց, որ իրենք գիտակցում են, որ ինչպես ցանկացած շուկայում, այնպես էլ հայկական, պետք է մրցունակ գներ առաջարկել: «Մենք նոր ենք մուտք գործում այս շուկա, բայց կարծում եմ, որ ժամանակի ընթացքում կամրապնդենք մեր տեղը: Մենք մրցելու ենք այստեղ՝ գրավիչ գներ առաջարկելու համար: Ես կվարանեի կանխատեսել, թե որքանով կփոփոխվեն տոմսերի գները մեր մուտքով, բայց ավիատոմսերի գները կախված կլինեն առաջարկի ու պահանջարկի հատման կետից: Կարծում ենք, որ հաճախորդները դրական կարձագանքեն»,- ընդգծեց «Էթիհադ Էյրվեյզ»-ի վաճառքի գծով ավագ փոխնախագահը:

Ընկերության տարածաշրջանի հարցերով գլխավոր տնօրեն Օկսանա Սվետենկոն հավելեց, որ տարածաշրջանում Հայաստանն առաջին երկիրն է, ուր ավիաընկերությունը չվերթներ է իրականացնում: Ընկերությունը փորձում է ցանց ստեղծել՝ թռիչքներ իրականացնելով աշխարհի տարբեր քաղաքներ:

«Էթիհադ Էյրվեյզ» ավիաընկերությունը սկսել է գործել 2003 թվականից: Անցած տարի այն փոխադրել է 11.5 միլիոն ուղևորի: Ավիաընկերությունը նոր ուղղություններով ուղևորափոխադրումներ և բեռանփոխադրումներ է կատարելու Մերձավոր Արևելքում, Աֆրիկայում, Եվրեպայում, Ասիայում, Ավստրալիայում և ամերիկյան աշխարհամասում: 2013 թվականի ցուցանիշներով' ընկերության եկամուտը կազմել է 6.1 միլիարդ դոլար, իսկ զուտ շահույթը` 62 միլիոն դոլար: