ՄԹ-ը կպահպանի Հայաստանին և Ադրբեջանին ռազմական տեխնիկա մատակարարելու ԵԱՀԿ էմբարգոն

Միացյալ Թագավորութունը վերահաստատել է իր հավատարմությունը Լեռնային Ղարաբաղի հակամարտութան գոտում Հայաստանին եւ Ադրբջանին ռազմական տեխնիկա մատակարարելու ԵԱՀԿ էմբարգոյին: «Արմենպրես»-ի փոխանցմամբ` հուլիսի 2-ին նման հայտարարությամբ է հանդես եկել ՄԹ Եվրոպայի հարցերով պետնախարարը: «Միջազգային պարտավորություններից և առկա իրավիճակից ելնելով` Միացյալ Թագավորությունը պարբերաբար վերանայում է իր արտահանման քաղաքականությունը էմբարգոյի ենթարկված ուղղություններով: Մանրամասնորեն ուսումնասիրելով Հայաստան և Ադրբեջան արտահանման ու առևտրի լիցենզիայի տրամադրման ընթացակարգերը, Կառավարությունը կշարունակի կիրառել ԵԱՀԿ էմբարգոն երկու երկրների ուժային կառույցներին ռազմական տեխնիկա մատակարարելու համար, որոնք կարող են օգտագործվել Լեռնային Ղարաբաղի տարածքում կամ Հայաստանի և Ադրբեջանի ցամաքային սահմանին»,- ասվում է հայտարարությունում:

Մարդասիրական, խաղաղապահական, հետազոտական կամ լրատվական կազմակերպությունների համար նախատեսված ռազմական սարքավորումներ էմբարգոյի չեն ենթարկվի, քանի դեռ հստակ վտանգ չկա, որ դրանք կարող են վերածվել զինված ուժերի, ոստիկանության կամ անվտանգության ուժերի: Արտահանման և առևտրի լիցենզիայի բոլոր դիմումները կգնահատվեն առանձին հիմունքներով:

Նշվում է, որ Հարավային Կովկասը ռազմավարական կարևոր նշանակության տարածք է Միացյալ Թագավորության համար: Համագործակցելով թե՛ Հայաստանի և թե՛ Ադրբեջանի հետ ՄԹ-ն շարունակում է աշխատանքները տարածաշրջանում խաղաղության, անվտագության և փոխըմբռման հաստատման համար: «Մենք մեծապես աջակցում ենք ԵԱՀԿ Մինսկի խմբին Լեռնային Ղարաբաղի հակամարտության խաղաղ և տևական լուծում գտնելու գործում»,- նշել է պետնախարարը: