Ըմբիշ Միհրան Հարությունյանը Հայաստանի դրոշի ներքո կմասնակցի Օլիմպիայի և Բուխարեստի մրցաշարերին

Հունահռոմեական ոճի ըմբշամարտի Հայաստանի հավաքականի նոր անդամ Միհրան Հարությունյանն ուրախ է հանդես գալու երկրի ընտարնու կազմում:

«Շատ ուրախ եմ, որ դա վերջապես իրականություն դարձավ, ու ես արդեն կարող եմ հայրենիքիս դրոշի ներքո հանդես գալ: Շատ ափսոս միայն, որ աշխարհի առաջնության նախապատրաստական փուլ հանդիսացող վերոհիշյալ կարևորագույն մրցաշարերը ստիպված եղա բաց թողնել: Ժամանակն աղետալի ձևով չի բավականցնում»,- «Արմենպրես»-ի հաղորդմամբ՝ Հարությունյանի խոսքերը մեջբերում է Հայաստանի ըմբշամարտի ֆեդերացիայի կայքը:

Ըմբիշի առաջիկա մեկնարկները կլինեն, նախ, հուլիսի 19-20-ին հունական Օլիմպիայում, ապա՝ հուլիսի 27-29-ին, Ռումինիայի մայրաքաղաք Բուխարեստում կայանալիք միջազգային մրցաշարերում:

«Քիչ ժամանակ է մնում մինչ աշխարհի առաջնության մեկնարկը, սակայն այդ 2 մրցաշարերում կջանամ առաջնությանը լավագույնս նախապատրաստվելու համար առավելագույնն անել: Հավաքականի անդամները բոլորն էլ կարևոր մրցաշարերում արդեն փորձակել են իրենց ուժերը, միայն ես դեռ մրցաշարերին մասնակցելու կարիք ունեմ: Հավաքից-հավաք ընկած ժամակաշրջանում մարզվում եմ հայրենի Էջիածնում ու Երևանում: Ես հիմա Հայաստանի հավաքականի կազմում հուլիսի 5-ին կմեկնեմ Ալուշտա՝ ուսումնամարզական հավաքի, իսկ այնտեղից արդեն կուղևորվեմ Հունաստանի և Ռումինիայի մրցաշարերում հան դես գալու »,- ասել է ըմբիշը:

Ծննդով Էջմիածինցի Միհրան Հարությունյանը, ով անցած տարեվերջին նվաճել էր 66 կգ քաշային կարգի Հայաստանի չեմպիոնի կոչումը, վերջապես ՖԻԼԱ-ից պաշտոնապես իրավունք է ստացել հուլիս 1-ից միջազգային մրցասպարեզում ներկայացնելու Հայաստանը: