Ավստրիական հեռուստաընկերությունները պատրաստ են մինչև 25 մլն եվրո ծախսել «Եվրատեսիլ-2015»-ի կազմակերպման համար

Ավստրիայի հեռուստառադիոհաղորդումների ORF հանրային ընկերությունը պատրաստ է «Եվրատեսիլ-2015» երգի մրցույթի նախապատրաստման և անցկացման համար ծախսել մինչև 25 մլն եվրո: Այդ ծախսերը հաստատել է ընկերության ֆինանսական խորհուրդը: Կազմակերպիչներն ակնկալում են, որ տոմսերի, հուշանվերների և այլ իրերի վաճառքից դրամական մուտքերը կկազմեն շուրջ 10 մլն եվրո, տեղեկացնում է «Արմենպրես»-ը:

ORF-ում պլանավորում են արդեն մինչև ամսվա վերջն ընտրել մրցույթի անցկացման վայրը: «Մեր տեխնիկական խմբերն առաջիկա շաբաթներին կստուգեն առկա հարթակները»,-հայտնել են հեռուստաընկերությունում, պարզաբանելով, որ դրանից հետո բանակցություններ կվարեն քաղաքային իշխանությունների հետ:

Առայժմ «Եվրատեսիլի» անցկացման իրավունքի համար մրցակցում են երեք քաղաքներ: Նախնական հավանության են արժանացել Գրացի, Ինսբրուքի և Վիեննայի հայտերը: Ավստրիայի մայրաքաղաքի իշխանությունները ORF-ին առաջարկել են, հատկապես, «Շտադտհալլե» համերգասրահը:

Պլանավորվում է, որ վերջնականապես բյուջեն կհաստատվի աշնանը, իսկ մինչև տարվա վերջ ավստրիացիները պետք է Եվրոպայի հեռարձակողների միության հավանությանը ներկայացնեն մրցույթի թեման և նախագիծը: 2015 թվականի մրցույթի անցկացման իրավունքը Ավստրիան ստացել է այն բանից հետո, երբ ավստրիացի Թոմաս Նոյվիրտը Կոնչիտա Վուրստ մորուքավոր կնոջ կերպարում շահեց «Եվրատեսիլ-2014»-ը, հաղորդել է ԻՏԱՌ-ՏԱՍՍ-ը: