Գալուստ Սահակյանը հանդիպեց Վալենտինա Մատվիենկոյի հետ

Հայաստանի ԱԺ նախագահ Գալուստ Սահակյանը հուլիսի 7-ին հանդիպեց Ռուսաստանի Դաշնության Դաշնային ժողովի Դաշնության Խորհրդի նախագահ Վալենտինա Մատվիենկոյի հետ:

ԱԺ մամուլի ծառայությունից հայտնում են, թե ՌԴ Դաշնության Խորհրդի նախագահը, շնորհավորելով ԱԺ նախագահ Գալուստ Սահակյանին ԱԺ նախագահ ընտրվելու կապակցությամբ և բարձր գնահատելով երկու երկրների հարաբերությունները, վստահություն հայտնեց, որ երկու խորհրդարանների համագործակցության շրջանակը հետայսու ևս կընդլայնվի, փոխգործակցությունը կխորանա թե երկկողմ, թե բազմակողմ ձևաչափերով: Նա կարևոր համարեց առևտրատնտեսական կապերի ընդլայնումը, ռազմատեխնիկական համագործակցության ամրապնդումը, հումանիտար ոլորտում փոխգործակցության հետագա զարգացումը: Տիկին Մատվիենկոն գոհունակությամբ փաստեց միջռեգիոնալ հաջող համագործակցությունը՝ նշելով, որ ՌԴ 70 սուբյեկտներ փոխգործակցում են Հայաստանի մարզերի և քաղաքների հետ: Անդրադառնալով Հայաստանի՝ Եվրասիական տնտեսական միությանն անդամակցելուն՝ Վալենտինա Մատվիենկոն բարձր գնահատեց այդ ուղղությամբ Հայաստանի կողմից կատարվող ակտիվ քայլերը: Նա ողջունեց 2013թ. Հայաստանի խորհրդարանում ռուսական գրադարանի և հայ-ռուսական բարեկամության ակումբի բացումը: Դաշնության Խորհրդի նախագահը կարևոր և անհրաժեշտ համարեց համագործակցությունը միջազգային խորհրդարանական կառույցներում:

Շնորհակալություն հայտնելով ջերմ ընդունելության համար՝ ԱԺ նախագահը նշեց, որ Հայաստանը մեծապես կարևորում է Ռուսաստանի հետ երկկողմ հարաբերությունների ողջ սպեկտրի հետագա ընդլայնումն ու խթանումը, ինչը Հայաստանի Հանրապետության արտաքին քաղաքականության կարևորագույն ուղղություններից է: «Յուրաքանչյուր այց, պաշտոնական հանդիպում կարևոր ուղենիշ է երկու երկրների միջև հարաբերությունների զարգացման և ամրապնդման գործում»,-ասաց Գալուստ Սահակյանը: Նրա համոզմամբ՝ երկու երկրների ղեկավարների, խորհրդարանականների և պաշտոնյաների հանդիպումների պարբերական բնույթը, խորհրդարանական երկխոսությունը, ինչպես նաև համագործակցության լայն շրջանակները վերստին հաստատում են քաղաքական, տնտեսական, հումանիտար և ռազմավարական ոլորտներում փոխգործակցության դաշնակցային մակարդակը: ԱԺ նախագահի խոսքով՝ երկկողմ փոխգործակցության, ինչպես նաև ազգային օրենսդրությունների ներդաշնակեցման և ինտեգրացիոն գործընթացների ամուր իրավական հիմքի ձևավորման գործում մեծ դերակատարություն ունի միջխորհրդարանական փոխգործակցությունը: «Վստահորեն կարող եմ նշել, որ խորհրդարանական համագործակցությունը կրում է վերընթաց և պարբերական բնույթ: Այդ համատեքստում իր կարևոր դերն ունի Հայ-ռուսական միջխորհրդարանական հանձնաժողովը»,- նշեց ԱԺ նախագահը: Ըստ ԱԺ նախագահի՝ երկկողմ համագործակցության կարևորագույն ուղղություններից է նաև առևտրատնտեսական փոխգործակցության խթանումը, և Հայաստանն անհրաժեշտ քայլեր է ձեռնարկում առևտրատնտեսական համագործակցության հետագա ընդլայնման համար՝ առաջնահերթ ստեղծելով բարենպաստ ներդրումային մթնոլորտ: Գալուստ Սահակյանը նշեց, որ վերընթաց բնույթ է կրում նաև միջտարածաշրջանային համագործակցությունը, կայուն փոխգործակցություն է նկատվում ռազմաքաղաքական և ռազմատեխնիկական ոլորտներում:

Տարածաշրջանային հարցերի համատեքստում ԱԺ նախագահը կարևորեց Ռուսաստանի ակտիվ դերակատարությունը Լեռնային Ղարաբաղի հակամարտության կարգավորման գործընթացում՝ ԵԱՀԿ Մինսկի խմբի շրջանակներում:

Պարոն Սահակյանը տիկին Մատվիենկոյին հրավիրեց մասնակցելու 2015թ. ապրիլին Երևանում կայանալիք Մեծ Եղեռնի զոհերի հիշատակին նվիրված միջոցառումներին:

Հանդիպման վերջում ԱԺ նախագահ Գալուստ Սահակյանը գրառում կատարեց ՌԴ Դաշնության Խորհրդի պատվավոր հյուրերի գրքում և տիկին Մատվիենկոյի ուղեկցությամբ շրջայց կատարեց Դաշնության Խորհրդի շենքում: