Րաֆֆի Հովհաննիսյանը համաձայն չէ ԼՂ հակամարտության կարգավորման մասին Ջոն Հեֆերնի հայտարարությանը

«Ժառանգություն» կուսակցության նախագահ Րաֆֆի Հովհաննիսյանը կարծիքով՝ քանի դեռ Արցախի իշխանությունները բանակցային սեղանի շուրջ չեն, Լեռնային Ղարաբաղի հակամարտության խաղաղ կարգավորման գործընթացը չի կարող առաջ գնալ: Հուլիսի 8-ին լրագրողների հետ հանդիպման ժամանակ քաղաքական գործիչն անդրադարձավ Հայաստանում ԱՄՆ դեսպան Ջոն Հեֆերնի արած հայտարարությանը: «Ես չեմ ուզում օտար, անգամ բարեկամ երկրի դեսպանի խոսքը վերլուծել: Կարծում եմ, որ ամեն միջնորդ երկիր հետապնդում է ոչ միայն ընդհանուր սկզբունքներ, այլև իր սեփական քաղաքականությունն է առաջ տանում: Մենք դեմ ենք Մադրիդյան սկզբունքներին և կողմ ենք Արցախի ճանաչմանն ու տարածքային ամբողջականությանը: Եթե մենք պետք է ինտեգրվենք որևէ ուղղությանը, պետք է դա անենք Հայաստանի ազգային շահն ապահովելով»,- «Արմենպրես»-ի հաղորդմամբ' ասաց Րաֆֆի Հովհաննիսյանը:

Նրա համոզմամբ' եթե լինելու են փոխզիջումներ, օրինակ, փոխադարձ սահմանային ճշգրտումներ, գաղթականների վերադարձ, դա պետք է լինի Արցախի և Ադրբեջանի պատվիրակների համաձայնության արդյունքում: «Ես կարծում եմ, որ Հայաստանն իր ինքնիշխան վերաբերմունքը պետք է ցույց տա' ճանաչելով Արցախն իր ամբողջականությամբ»,- նշեց Րաֆֆի Հովհաննիսյանը' հավելելով, որ, եթե Հեֆերնի հայտարարությունն այնպիսին է, ինչպես լրագրողն է ներկայացնում, ապա ինքը համաձայն չէ դեսպանի ասածի հետ: