Րաֆֆի Հովհաննիսյանը՝ Թուրքիայի կողմից հայ-թուրքական սահմանը բացելու լուրերի մասին

«Ժառանգություն» կուսակցության նախագահ Րաֆֆի Հովհաննիսյանը վստահ է, որ մինչև Հայոց ցեղասպանության 100-րդ տարելիցը Թուրքիան կշարունակի տարբեր ցուցադրական քայլեր կատարելու իր քաղաքականությունը, իսկ հայ ժողովուրդը պետք է ինքը որոշի, թե դրանք ինչ բովանդակություն են պարունակում: Հուլիսի 8-ին կայացած մամուլի ասուլիսի ժամանակ հայտնեց Րաֆֆի Հովհաննիսյանը:

«Արմենպրես»-ի հարցադրմանն ի պատասխան, թե ինչ նպատակ է հետապնդում հայ-թուրքական սահմանի բացման վերաբերյալ թուրքական կողմից տարածված տեղեկատվությունը, քաղաքական գործիչը նշեց. «Չի բացառվում, որ մինչ Հայոց ցեղասպանության 100-րդ տարելիցը Թուրքիայի ժեստային քաղաքականությունը շարունակվի, ու հնարավոր է, որ այդ քաղաքականության քայլերից մեկը լինի, ոչ անպայման սեպտեմբեր-հոկտեմբերին, բայց հաջորդ տարվա ապրիլի առաջին կեսին սահմանի բացման մասին խոսքը կամ իրականացումը որոշ պայմանների ներքո: Բայց եթե դա լինելու է Հայաստանի հաշվին, ես դեմ եմ դրան. Հայաստանն ու հայ ժողովուրդը պետք է ինչ-որ բան անեն, որ սահմանը բացվի այն պետության կողմից, որը փակել է ու հայ ժողովրդին պահում է շրջափակման մեջ: Ես կարծում եմ, որ կարելի է ականկալել, որ ժեստերը կշարունակվեն, և մեր ժողովրդին է մնալու որոշել դրանք բովանդակություն պարունակում են, թե ոչ»,- ասաց Րաֆֆի Հովհաննիսյանը:

Ինչ վերաբերում է հայ-թուրքական արձանագրություններին, ապա Րաֆֆի Հովհաննիսյանը ևս մեկ անգամ շեշտեց, որ, իր կարծիքով, դրանք պետք է առոչինչ հայտարարվեն: «Կարելի է, որ երկու պետությունները դիվանագիտական նոթեր փոխանակեն, հաստատեն դեսպանություններ և միասին աշխատեն վիճահարույց խնդիրները լուծելու ուղղությամբ: Դրանց մեջ կա Ճանաչման, կրթության, մշակութային ժառանգության, հայ մարդու և իր հայրենքի միացման հարցերը և հետո վերջնական սահմանի ճշգրտման հարցը: Անցած ապրիլի 24-ի նախաշեմին Էրդողանի հայտարարությունը պոլսահայ համայնքի համար մեծ փոփոխություն էր, բայց մեծ հաշվով այն որևէ փոփոխություն չբերեց հայ ժողովրդին: Ինչպես ասվեց Հայաստանում և սփյուռքում, դա ժխտման քաղաքականության արդի, ավելի նուրբ մոտեցումն է»,- ավելացրեց Րաֆֆի Հովհաննիսյանը:

Նրա կարծիքով, եթե մինչև հաջորդ տարի' ցեղասպանության 100-րդ տարելիցը, Թուրքիան շարունակի նախապայմաններով խոսել Հայաստանի հետ, ապա վերջինը պետք է դուրս գա առանց նախապայմանների բանակցելու վիճակից ու հայտնի իր նախապայմանները: