Թուրքիայում ազատազրկված պոլսահայ մտավորականին 6 ամսում 4 բանտ են տեղափոխել

Հասարակություն 9 Հուլիս, 2014 1:43

Պոլսահայ հայտնի լեզվաբան, գրող, հրապարակախոս Սևան Նիշանյանին ազատազրկման օրվանից 6 ամսվա ընթացքում արդեն 4-րդ բանտն են տեղափոխել: Վերջին անգամ Ալիաղա Շաքրանի փակ ռեժիմով բանտթից նրան տեղափոխել են մեկ այլ փակ ռեժիմով կալանավայր` Այդըն Ենիփազար: Այս մասին, ինչպես հաղորդում է «Արմենպրես»-ը, հայտնում է թուրքական DemokratHaber լրատվական կայքը:

Սևան Նիշանյանը ազատազրկվել է 2014 թվականի հունվարի 2-ին և տեղափոխվել Թորբալը բաց կալանավայր: Թուրքական դատարանը նրան մեղավոր է ճանաչել Իզմիրի Շիրինջե գյուղում սեփական հողատարածքի 40 քառ.մ տարածքի վրա «ապօրինի» կառուցապատում կատարելու համար:

Նիշանյանն ինքը և թուրք առաջադեմ մտավորականությունը գտնում են, որ Թուրքիայի վարչապետ Թայիբ Էրդողանի վարչակազմը պոլսահայ մտավորականի նկատմամբ քաղաքական հետապնդում է իրականացնում և նրան լռեցնելու ու ճնշելու տարբեր պատրվակներ ստեղծում: Նիշանյանին թուրքական վարչակարգը հալածանքների է ենթարկում Թուրքիայի հանցավոր անցյալը և ներկայիս իշխանությունների վարած քաղաքականությունը քննադատելու համար:

Սևան Նիշանյանի հրապարակած վերջին` «Սխալ քաղաքականություն» աշխատության մեջ ներկայացվում է Թուրքիայի Հանրապետությունն իր բոլոր արատավոր կողմերով` սկսած 1923 թվականից մինչև մեր օրերը:

Թուրքական իշխանությունների հրահանգով Նիշանյանի համար բանտում նույնիսկ տարրական պայմաններ չեն ապահովում: Կալանավայրերից մեկում` Բուջայում, նրան անգամ մահճակալ չէին հատկացրել և արգելել էին օգտվել բաղնիքից:

«Ազատություն Սևան Նիշանյանին» միջազգային հանձնաժողովի անդամ Սաիդ Չեթինօղլուն կայքին հայտնել է, որ Նիշանյանի դեմ կառավարության գործադրած ճնշումն ու սահմանափակումները պետք է վերացվեն: Նա նշել է, որ, Նիշանյանին շինծու մեղադրանքներով 4 տարվա ազատազրկման դատապարտելով, թուրքական իշխանությունները նպատակ ունեն նրան անազատության մեջ պահել Հայոց ցեղասպանության 100-ամյա տարելիցի 2015 թ-ին: