ԵՏՄ-ին Հայաստանի անդամակցության պայմանագրի ստորագրումը պայմանավորված չէ Լեռնային Ղարաբաղով. ՀՀ վարչապետ

Եվրասիական տնտեսական միությանը Հայաստանի անդամակցության պայմանագրի ստորագրումը պայմանավորված չէ Լեռնային Ղարաբաղով: Այդ մասին Գյումրիում լրագրողների հետ զրույցում նշեց ՀՀ վարչապետ Հովիկ Աբրահամյանը: «Կան մի քանի տեխնիկական հարցեր, որոնք անպայման կունենան լուծումներ: Հուլիսի 11-ին ես հանդիպելու եմ Ռուսաստանի Դաշնության վարչապետ Դմիտրի Մեդվեդևի հետ: Հանդիպման ընթացքում ք ննարկվելու է նաև այդ հարցը» ,-«Արմենպրես»-ի փոխանցմամբ՝ ասաց վարչապետը: Հովիկ Աբրահամյանը խոստացավ, որ հանդիպման արդյունքների վերաբերյալ կտրվի համապատասխան լրատվություն:

Ռուսաստանը, Բելառուսը և Ղազախստանը մայիսի 29-ին Աստանայում ստորագրեցին Եվրասիական տնտեսական միության մասին պայմանագիրը, այն ուժի մեջ կմտնի 2015թ․ հունվարի 1-ից: Հայաստանը, որ հայտ է ներկայացրել է Մաքսային միության անդամ դառնալու, ստեղծել է ճանապարհային քարտեզ և համաձայնեցրել բոլոր հարցերը: ԵՏՄ-ն կլինի վերպետական տնտեսական տարածք, որի անդամ երկրները միմյանց հետ կիրականացնեն առևտուր սահմանված հատուկ մաքսատուրքերով: