Սպասված կինոպրեմիերաներ. հայ կինոսերներն ամռանը տխրելու առիթներ չեն ունենա

Հայ կինոսերները հուլիս-օգոստոս ամիսներին տխրելու առիթ չեն ունենա: Ամռան շոգին նրանք հնարավորություն կունենան այցելել «Մոսկվա» կինոթատրոն, և այնտեղ դիտել ամբողջ աշխարհում երկար ժամանակ սպասված ֆիլմերի պրեմիերաները: Կինոթատրոնից «Արմենպրես»-ի թղթակցին տրամադրած տեղեկատվության համաձայն' հուլիսի 17-ից հայ ակնդիրը հնարավորություն կունենա դիտել 2014-ին նկարահանված և արդեն հուլիսի 10-ին համաշխարհային կինովարձույթում հայտնված «Քայլ առաջ» կինոպատման հերթական «Քայլ առաջ. Ամեն ինչ կամ ոչինչ» կինոնկարը: Պարեր, կիրք, երազանք... «Քայլ առաջ» կինոպատման բոլոր ֆիլմերն անտարբեր չեն թողնի ակնդրին:

Կրկին հուլիսի 17-ից կինոթատրոնի էկրանին հնարավոր կլինի դիտել «Կապիկների մոլորակը. Հեղաշրջում» ֆիլմը, որը ցուցադրվել է Մոսկվայի միջազգային կինոփառատոնի փակմանը: Ֆիլմում խաղում է նաև հայտնի դերասան Գարի Օլդմանը:

Հուլիսի 24-ից «Մոսկվա» կինոթատրոնում կհայտնվի «Հերակլես» կինոնկարը, որի գլխավոր հերոսին մարմնավորել է Դուեյն Ջոնսոնը: «Մարվել» ընկերության կոմիքսների հիման վրա նկարահանած «Գալակտիկայի պահապանները» ֆանտաստիկ կինոնկարը հայկական էկրաններին կլինի հուլիսի 31-ից:

Օգոստոսը ևս հարուստ կլինի պրեմիերաներով: Օգոստոսի 7-ից հնարավոր կլինի դիտել «Փոթորկին ընդառաջ» ժապավենը, ինչպես նաև «Նինդիա կրեաները» ֆիլմը:

Սիրված «Անզուսպները» կինոնկարի երրորդ մասը հանդիսատեսը կկարողանա դիտել օգոստոսի 14-ից: Ինչպես և նախորդ ֆիլմերում, երրորդ մասում ևս դերասանների իսկական աստղաբույլ է հավաքվել: Բավական է նշել, որ ֆիլմում կփայլեն այնպիսի անվանի դերասաններ, ինչպիսիք են Սիլվեսթր Ստալոնեն, Ջեյսոն Սթեթհեմը, Ջեթ Լին, Արնոլդ Շվարցնեգերը, Անտոնիո Բանդերասը, Մել Գիբսոնը, Հարիսոն Ֆորդը և այլք: Ամսվա վերջում հայ ակնդիրը կդիտի «Եթե ես մնամ» ժապավենը, որի կարգախոսն է «Ապրիր սիրո համար»:

Ներկայացված բոլոր ֆիլմերը նկարահանված են հենց 2014 թվականին: