ՆԱՏՕ-Հայաստան-ՀԱՊԿ եռանկյունին համագործակցության արժեքավոր մոդել է

ՆԱՏՕ-ի հետ Հայաստանի հարաբերությունները կանոնակարգվել են փոխադարձ ընկալմամբ և Հայաստանի արտաքին քաղաքականության առաջնահերթությունների նկատմամբ հարգանքով: Այլ միությունների հետ համագործակցության առումով Հայաստանն ազատ է և ՀԱՊԿ-ին անդամակցության վերաբերյալ ՆԱՏՕ-ում մտահոգված չենք: «Հայաստանի հետ լավ երկխոսություն ունենք, լավ համագործակցություն կա պաշտպանության և անվտանգության հարցերում: Հայկական զ որքերը մասնակցում են ՆԱՏՕ-ի խաղաղապահ առաքելություններին՝ տարբեր երկրներում. դա ամենամեծ ներդրումն է, որը երկիրը կարող է ունենալ, ինչի համար շնորհակալ ենք»,-«Արմենպրես»-ի փոխանցմամբ՝ հուլիսի 9-ին «Անվտանգության նոր մարտահրավերները և ՆԱՏՕ-ն» թեմայով քննարկման ժամանակ հայտարարեց ՆԱՏՕ-ի տեղեկատվության և հասարակայնության հետ կապերի բաժնի Կովկասի և Կենտրոնական Ասիայի համակարգող Դեսպինա Աֆենտուլին:

Անդրադառնալով ՆԱՏՕ-Հայաստան-ՀԱՊԿ եռանկյունուն, Հայաստանում Մեծ Բրիտանիայի դեսպան Քեթրին Լիչը նշեց, որ Հայաստանը ՀԱՊԿ-ի անդամ լինելով և համագործակցելով ՆԱՏՕ-ի հետ, կարողանում է հանուն իր շահի առավելագույնը քաղել: Նույն տեսակետը հայտնեց նաև Հայաստանում Գերմանիայի դեսպան Ռայներ Մորելը՝ ցանկություն հայտնելով, որ Հայաստանը շարունակի նույն քաղաքականությունը և լինելով ՀԱՊԿ անդամ՝ համագործակցի ՆԱՏՕ-ի հետ. «Այս տեսակ կամրջումը բարդ է, ավելի է բարդանում հատկապես ուկրաինական ճգնաժամի ներքո, բայց սա կարելի է դիտարկել, որպես մի արժեքավոր մոդել»:

Երևանում մեկնարկել է «Անվտանգության նոր մարտահրավերները և ՆԱՏՕ-ն» թեմայով քննարկումը, որի նպատակն է ներկայացնել Հայաստան-ՆԱՏՕ հարաբերություններն ու համագործակցության նոր ուղիներ և մարտահրավերներ վեր հանել: