Նոր Սահմանդրությամբ մշակվող մեխանիզմները պաշտոնյային հաշվետու կդարձնեն հասարակության առաջ. Գագիկ Հարությունյան

Հայաստանի սահմանադրությունը պետք է սահմանի հանրային իրավական պատասխանատվության մեխանիզմները և իրավունքի գերակայությունը: Եթե մինչ այժմ սահմանադրությամբ գերակա է եղել օրենքը, որը իշխանակենտրոն Սահմանադրության վկայություն է, ապա այսուհետ պետք է հիմք դրվի իրավական գերակայությանը, այսինքն' մարդակենտրոն Սահմանադրության հաստատմանը: Այս մասին Սահմանադրական բարեփոխումների նախնական հայեցակարգի շուրջ Լոռու մարզում կայացած հանրային քննարկման ժամանակ ասաց Հայաստանի Սահմանդրական դատարանի նախագահ Գագիկ Հարությունյանը: «Մենք չենք կարող իրավական պետություն ստեղծել, եթե անիրավական քայլերով ենք առաջնորդվում: Սահմանդրությամբ պետք է սահմանվեն պատասխանատվության այն մեխանիզմները, որոնք պետական պաշտոնյային հաշվետու կդարձնեն հասարակության հանդեպ և հիմք կհանդիսանան անօրինությունների վերացման համար: Իշխանակենտրոնության պարագայում իշխանությունը և նրա հայեցողությունը սահմանափակված չեն օրենքով. այդ հայցը պետք է լուծվի մարդակենտրոն Սահմանադրությամբ»,- «Արմենպրես»-ի հաղորդմամբ' ասաց Հարությունյանը:

Սահմանադրական դատարանի նախագահը պատմական ակնարկ կատարեց' ներկայացնելով Հայաստանի պատմության մեջ սահմանադրականության հիմքերը: Նրա խոսքով' սահմանադրությունների միջազգային զարգացումները երկու հիմնական վեկտոր ունեն' իշխանակենտրոն Սահմանադրություն և մարդակենտրոն Սահմանադրություն: Երկրորդ պարագայում կենտրոնում մարդն է, և ամեն ինչ համապատասխանում է նրա բնական իրավունքների ու ազատությունների գերակայությանը: «Անկախացումից հետո Սահմանադրության ստեղծումը գնաց իշխանակենտրոն սահամանդրության ստեղծման ճանապարհով, որը մեծ դեր ուն եցավ մեր պետականության կայացման հարցում: 2005-ին մենք փորձեցինք մարդակենտրոն Սահմանադրության համար ուղղություններ մատնանշել և այժմ ցանկանում ենք հասնել այդ հարցի լուծմանը»,- ասաց Հարությունյանը:

Գագիկ Հարությունյանի համոզմամբ' քանի դեռ շատ խնդիրներ իրենց լուծումը չեն գտել Սահմանադրությամբ, քաղաքացու համար դժվար կլինի իրացնել իր իրավունքը: «Որքան խնդիրները հստակեցված չեն, այնքան իշխանությունը չի կարող ավելի լավը դառնալ: Համակարգը պետք է այնպիսին լինի, որ հայեցողության սահմանները լինեն սահմանափակ, իշխանությունը սահմանափակված լինի իրավունքով, իսկ հայեցողությունը լինի վերահսկելի: Իմ ցանկությունն է, որ իմ երեխաները ապրեն այնպիսի երկրում, որտեղ չինովնիկները չեն որոշոմ նրանց ճակատագիրը, որտեղ կա Սահմադրություն, որը սա հման է դնում, տալիս է նաև ազատության սահմանները»,- նշեց Հարությունյանը:

Սահմանադրական բարեփոխումների հայեցակարգի հանրային քննարկումների մարզային փուլի շրջանակներում հանդիպումներ են անցկացվել Աշտարակում, Արտաշատում, Արմավիրում, Գավառում: ՀՀ Նախագահին կից սահմանադրական բարեփոխումների մասնագիտական հանձնաժողովի անդամները քննակում են ունեցել նաև հոգևորականների հետ Մայր Աթոռում և սպասում են նրանց առաջարկություններին, որոնք հաշվի կառնվեն վերջնական հայեցակարգի մշակման ժամանակ: