Հովիկ Աբրահամյանի հետ հանդիպմանը ՌԴ վարչապետն ընդգծել է Հայաստանի հետ հարաբերությունների դաշնակցային բնույթը

Ռուսաստանի Դաշնություն կատարած աշխատանքային այցի շրջանակներում ՀՀ վարչապետ Հովիկ Աբրահամյանը Սոչիում հանդիպեց ՌԴ իր գործընկերոջ՝ Դմիտրի Մեդվեդևի հետ: Ինչպես Սոչիից փոխանցում է «Արմենպրես»-ի թղթակիցը, ողջունելով Հովիկ Աբրահամյանին՝ Դմիտրի Մեդվեդևը նշեց, որ այս այցը հնարավորություն է տալիս քննարկելու ռուս-հայկական հարաբերությունների լայն շրջանակ` սկսած ներդրումային գործընթացներից, վերջացրած առևտրատնտեսական և հումանիտար բնագավառներում համագործակցությամբ: «Մեր երկրները շատ մոտ դաշնակիցներ են, մեր երկրները մոտ են ու ժողովուրդներն են շատ մոտ: Դա մեզ հնարավորություն է տալիս տեղեկատվություն փոխանակել մեր համագործակցության բոլոր հարցերի շուրջ: Սրտանց ողջունում եմ Ձեզ Սոչիում»,- ասաց Մեդվեդևը: Իր հերթին, Հովիկ Աբրահամյանը շնորհակալություն հայտնեց Դմիտրի Մեդվեդևին հրավերի և տարբեր հարցերի շուրջ մտքեր փոխանակելու հնարավորության համար: «Կարծում եմ՝ կկարողանանք մեր առանձնազրույցում արդյունավետ քննարկել մեզ հետաքրքրող հարցերը»,- ասաց Հովիկ Աբրահամյանը: ՀՀ վարչապետը և Դմիտրի Մեդվեդեւը քննարկել են նաեւ ինտեգրացիոն գործընթացները: Հովիկ Աբրահամյանի և Դմիտրի Մեդվեդևի ներկայությամբ Հայաստանի և Ռուսաստանի միջրացիոն ծառայությունների ղեկավարներն ստորագրել են Ռուսաստանի Դաշնության կառավարության և Հայաստանի Հանրապետության կառավարության միջև համաձայնագիրը «Հայաստանի Հանրապետության տարածքում Ռուսաստանի Դաշնության քաղաքացիների և Ռուսաստանի Դաշնության տարածքում Հայաստանի Հանրապետության քաղաքացիների գտնվելու կարգի մասին»:

Հանդիպումից հետո երկու երկրների վարչապետերի պատվին տրվել է աշխատանքային ճաշ: Հովիկ Աբրահամյանի գլխավորած կառավարական պատվիրակության կազմում են ՀՀ փոխվարչապետ, Տարածքային կառավարման նախարար Արմեն Գևորգյանը, ՀՀ ֆինանսների նախարար Գագիկ Խաչատրյանը, ՀՀ էներգետիկայի և բնական պաշարների նախարար Երվանդ Զախարյանը, ՀՀ առողջապահության նախարար Արմեն Մուրադյանը, ՀՀ կառավարության աշխատակազմի ղեկավար-նախարարի առաջին տեղակալ Գուրգեն Դումանյանը, ՀՀ էկոնոմիկայի նախարարի առաջին տեղակալ Գարեգին Մելքոնյանը, ՀՀ արտաքին գործերի նախարարի տեղակալ Շավարշ Քոչարյանը, ՀՀ տարածքային կառավարման նախարարության միգրացիոն պետական ծառայության պետ Գագիկ Եգանյանը և պաշտոնատար այլ անձինք: