«Ոսկե ծիրան» փառատոնը մեկնարկեց Ծիրանօրհնեքի ավանդական արարողությամբ

Երևանյան «Ոսկե ծիրան» 11-րդ միջազգային կինոփառատոնի մեկնարկը տրվեց հուլիսի 13-ին Ծիրանօրհնեքի ավանդական արարողությամբ: Իրադարձությունն այս տարի անցկացվեց Սուրբ Գրիգոր Լուսավորիչ եկեղեցում: Ծիրանօրհնեքի արարողությանը մասնակցեցին փառատոնի կազմակերպիչները, մասնակիցները, բազմաթիվ հյուրեր, լրատվամիջոցների ներկայացուցիչներ:

«Օրհնված ծիրան դեռ չեմ կերել, որովհետև իմ ձեռքի ծիրանները բաժանեցի հյուրերին, բայց հիմա կուտեմ: Երջանիկ եմ, որովհետև ծիրանօրհնեքը դարձել է հայկական ավանդույթ, և աշխարհն արդեն սկսում է ճանաչել մեր կրոնական և եկեղեցական սովորույթները: Փառատոնը միայն կինո չէ, սեր է, սեր, որ հայ ժողովուրդը բաժանում է իր հյուրերին: Ես հարյուրավոր փառատոնների եմ մասնակցել, սակայն այսպիսի ջերմություն չեմ զգացել, ոչ մի քաղաքում նման ձևով չեն ընդունել հյուրերին, ոչ ոք նմանատիպ սովորություններ չունի»,-«Արմենպրես»-ի փոխանցմամբ՝ արարողությունից հետո լրագրողների հետ զրույցում նշեց «Ոսկե ծիրան» երևանյան միջազգային կինոփառատոնի հիմնադիր տնօրեն Հարություն Խաչատրյանը:

«Ոսկե ծիրան» միջազգային կինոփառատոնը Երևանում տեղի ունեցող ամենամեծ մշակութային իրադարձություններից մեկն է: Հիմնվել է 2004 թվականին' «Ոսկե ծիրան» կինոյի զարգացման հիմնադրամի, Կինոգետների և կինոլրագրողների հայկական ասոցիացիայի կողմից։ «Ոսկե ծիրանի» հիմնադիրներն են փառատոնի գլխավոր տնօրեն կինոռեժիսոր Հարություն Խաչատրյանը, ծրագրերի տնօրեն, կինոքննադատ Միքայել Ստամբոլցյանը և գեղարվեստական տնօրեն կինոքննադատ Սուսաննա Հարությունյանը։ «Քաղաքակրթությունների ու մշակույթների խաչմերուկ». այս նշանաբանով է գործում «Ոսկե ծիրան» միջազգային կինոփառատոնը հիմնման պահից ի վեր: Փառատոնն ամեն տարի կինոարվեստի երկրպագուների ուշադրությանն է ներկայացնում 120-150 ֆիլմ'մրցութային և արտամրցութային տարբեր ծրագրերով։