«Ոսկե ծիրան»-ի մեկարկը տրվեց Սերգեյ Փարաջանովին նվիրված միջոցառումներով

Երևանյան «Ոսկե ծիրան» 11-րդ միջազգային կինոփառատոնի այս տարվա «հերոսը» Սերգեյ Փարաջանովն է: Անվանի ռեժիսորի 90-ամյակին նվիրված կինոտոնի փառատոնային առաջին օրն սկսվեց Փարաջանովին նվիրված միջոցառումներով: Հուլիսի 13-ին Մոսկվա կինոթատրոնի ճեմասրահում բացվեց Փարաջանովին նվիրված լուսանկարչական ցուցահանդեսը, որտեղ ներկայացված էին Յուրի Գարմաշի հեղինակած լուսանկարները, որոնք ներկայացնում էին Սերգեյ Փարաջանով ին՝ իր ողջ հմայքով:

Ցուցահանդեսի բացմանը ներկա էր նաև լուսանկարների հեղինակը: Յուրի Գարմաշը, շնորհակալություն հայտնելով «Ոսկե ծիրան»-ի կազմակերպիչներին, նշեց, որ առաջին անգամ է Հայաստանում: «Փարաջանովն իմ կյանքում յուրահատուկ դեր է խաղացել: Բացի իմ լուսանկարներից, ներառել եմ նաև այլ նկարներ: Մի շրջան եկավ, երբ ես հասկացա, որ հարգանքի տուրք պետք է մատուցեմ այն մարդուն, ով իմ կյանքում մեծ դեր է խաղացել: Իսկ ինչպե՞ս հարգանքի տուրք մատուցել այն մարդուն, որ այժմ կենդանի չէ: Ես հիշեցի, որ շատ եմ նկարահանել նրան, և կազմակերպեցի այս ցուցահանդեսը՝ նպատակ ու նենալով այն անցկացնել Ուկրաինայի տարածքով: Ուրախ եմ, որ ցուցահանդեսը Հայաստանում է՝ հանճարի հայրենիքում»,- «Արմենպրես»-ի փոխանցմամբ՝ նշեց Յուրի Գարմաշը:

Ցուցահանդեսին զուգահեռ ներկայացվեց նաև Գարրի Կունցևի՝ 2014 թվականին հրատարակած «Կար-չկար մի Փարաջանով» գիրքը, որը հրատարակել է «Փրինթինֆո»-ն:

Այնուհետև հանրությանը ներկայացվեց փառատոնի բացման ֆիլմի' Սերգեյ Փարաջանովի լեգենդար «Նռան գույնը» կինոնկարի՝ Սկորսեզեի հիմնադրամի կողմից վերականգնված տարբերակը:

Հայ անվանի կինոռեժիսոր Սերգեյ Փարաջանովը ծնվել է 1924-ի հունվարի 9-ին Թբիլիսիում։ 1946թ. Նրա առաջին կարևոր կինոնկարը «Մոռացված նախնիների ստվերներն» է ։ Փարաջանովի գլուխգործոց են համարում «Նռան գույնը» (1968), որը պատմում է թբիլիսահայ աշուղ Սայաթ-Նովայի կյանքի մասին ։ Կյանքի վերջին տարիներին Փարաջանովը նկարում էր ինքնակենսագրական «Խոստովանանք» ֆիլմը, որն անավարտ մնաց և հետագայում ամբողջությամբ օգտագործվեց Միքայել Վարդանովի «Փարաջանով։ Վերջին Գարուն» վավերագրական ֆիլմում։ Փարաջանովը մահացել է 1990 թվականի հուլիսին: