Ֆուտբոլային խճանկար. հայ ֆուտբոլասերները՝ Աշխարհի առաջնության մասին

Երեկ Բրազիլիայի «Մարականա» մարզադաշտում տեղի ունեցավ Աշխարհի 2014 թվականի առաջնության եզրափակիչ Գերմանիա-Արգենտինա հանդիպումը: Խաղի հիմնական ժամանակն ավարտվեց ոչ-ոքի: Լրացուցիչ ժամանակի երկրորդ խաղակեսում՝ 113-րդ րոպեին, Գերմանիայի հավաքականի կազմում փոխարինման դուրս եկած կիսապաշտպան Մարիո Գյոտսեն դարձավ հաղթական գոլի հեղինակ:

Աշխարհի առաջնության ընթացքի, Գերմանիայի՝ չեմպիոն դառնալու, ոչ ֆավորիտ հավաքականների ցուցադրած գեղեցիկ խաղի և բուքմեյքերական կանխատեսումների, Մեսսիի՝ լավագույն ֆուտբոլիստ ճանաչվելու վերաբերյալ իրենց տեսակետները Լուրեր.com-ի հետ զրույցում հայտնեցին քաղաքական դաշտի ներկայացուցիչները: 

«Ժառանգություն» կուսակցության մամուլի խոսնակ Դավիթ Սանասարյանի  համար Գերմանիայի հաղթանակն անակնկալ չէր. արդյունքն իր համար կանխատեսելի էր դեռ խաղերի սկզբից: «Այս խաղն ինձ համար առանձնահատուկ էր նրանով, որ ոչ ֆավորիտ թիմերը, թեև եզրափակիչ դուրս չեկան, բայց աշխարհին նոր խոսք ասացին: Ըստ էության, այդ ոչ ֆավորիտ թիմերից շատերն ավելի լավ խաղացին, քան մինչև կիսաեզրափակիչ հասած շատ թիմեր: Որոշ հավաքականներ իրենց խաղով այս առաջնության մեջ կարևոր գործ արեցին՝ կոտրեցին կարծատիպեր ու ստանդարտներ, որ աշխարհի չեմպիոնները կարող են խայտառակ պարտություն կրել ոչ ֆավորիտ հավաքականներից, այսինքն՝ առաջնությունը գաղափարական առումով նոր մեսիջ տվեց աշխարհին: Ես՝ ինքս, տարիներ շարունակ Բրազիլիայի երկրպագուն եմ եղել, բայց այն խաղը, որը ցույց տվեց Բրազիլիան, կապ չուներ Պելեի և մյուսների ներդրած մշակույթի հետ: Դրա համար առաջին խաղը տեսնելուց ես հայտարարեցի, որ Գերմանիայի հավաքականին եմ երկրպագելու: Գերմանիայի հավաքականն, ի տարբերություն մյուսների, ունի առանձնահատկություն՝ իրականում ցույց է տալիս, թե ինչ է նշանակում հավաքական բառը: Գերմանիայի հավաքականում թիմային խաղը ես տեսա մինչև վերջին պահը: Թեև Արգենտինան էլ լավ խաղաց, բայց ես այդպես էլ կանխատեսել էի, որ Գերմանիան կդառնա աշխարհի չեմպիոն»,- ասաց կուսակցության խոսնակը:

Գյումրիի քաղաքապետ Սամվել Բալասանյանի մամուլի խոսնակ Զոհրապ Եգանյանի կարծիքով՝ Գերմանիան հաղթանակի արժանի էր:

«Ընդհանուր առմամբ, Աշխարհի առաջնությունը շատ ուժեղ չէի համարի: Եթե անկեղծ լինենք, շնորհիվ մեկ ֆուտբոլիսի՝ Արգենտինան հասավ եզրափակիչ: Դա Լիոնել Մեսսին է, ով բոլոր ժամանակների աշխարհի լավագույն ֆուտբոլիստն է: Գերմանիայի հաղթանակը տրամաբանական էր և կարելի է ասել՝ ճիշտ»,- ասաց Եգանյանը: Վերջինիս կարծիքով՝ Մեսսիին լավագույն ֆուտբոլիստի կոչմանն արժանացնելը ևս ճիշտ որոշում էր: «Նա կարողացավ իր հետևից տանել ամբողջ Արգենտինայի հավաքականը: Նրա փոխանցումների կամ գոլերի շնորհիվ էր, որ Արգենտինայի հավաքականը կարողացավ անցնել հաջորդ փուլ: Թիմային խաղ Արգենտինան չուներ, ուներ Մեսսի, ում գերմանացիները եզրափակչում կարողացան փակել և ի վերջո՝ հաղթանակ տանել»,- ասաց նա: 

ԲՀԿ մամուլի խոսնակ, «Բարգավաճ Հայաստան» խմբակցության պատգամավոր Տիգրան Ուրիխանյանը ֆուտբոլասեր չէ, սակայն փոքր-ինչ հետևել է Աշխարհի առաջնության խաղերին: «Ես դիտում եմ բացառապես այն խաղերը, որոնց մասնակցում է Հայաստանի հավաքականը, այն էլ, ոչ թե ֆուտբոլային, այլ հայրենասիրական զգացումներից ելնելով: Այս առաջնությունը, այնքանով, որքանով ես ուշադրություն դարձրի, աչքի ընկավ անկանխատեսելիությամբ, իսկ ավելի ճիշտ՝ բուքմեյքերական կազմակերպությունների՝ չափից դուրս շահավետ գործունեությամբ»,- նկատեց նա: 

ԲՀԿ խոսնակի կարծիքով՝ ցանկացած թիմ, որն իրեն լավ և արհեստավարժ է դրսևորում, դառնում է հաղթանակի արժանի:

ՀՀԿ խմբակցության պատգամավոր Հովհաննես Սահակյանը երկրպագում էր Արգենտինայի հավաքականին: «Ցանկանում էի, որ Արգենտինան հաղթեր: Մեսսիի խաղը շատ ավելի հրապուրիչ և շատ ավելի գեղեցիկ խաղ էր: Բայց դե ֆուտբոլ է, մեկը հաղթում է, մյուսը՝ պարտվում: Կարևորը, կարծում եմ, որ երզրափակչի խաղը գեղեցիկ ստացված խաղ էր՝ ի տարբերություն մյուս խաղերի: Ընդհանուր առմամբ, գոհ ենք, Աշխարհի առաջնությունն այս ամռան օրերին հաճելի, գեղեցիկ, ժամանակներ, պահեր պարգևեց»,- ասաց Սահակյանը:

Ազատուհի Արասխանյան