«Հրապարակ». ԱՄՆ-ն անհանգստացած է այն հանգամանքով, որ Ռուսաստանը կարող է խաղաղապահներ մտցնել Ղարաբաղ

Մեր տեղեկություններով' ԵԱՀԿ ՄԽ համանախագահող երկրներ Ֆրանսիան եւ ԱՄՆ-ն, ի տարբերություն Ռուսաստանի, անում են ամեն ինչ, որպեսզի հուլիսի վերջին, Օլանդի նախաձեռնությամբ, Փարիզում տեղի ունենա հակամարտող երկրների նախագահների հանդիպում: Ի դեպ, մայիսի 7-ին' հրադադարի հաստատման 20-ամյակի օրը, ԱՄՆ դեսպանատուն են կանչվել մի խումբ հայ փորձագետներ' Դավիթ Շահնազարյան, Սերգեյ Մինասյան, Ստյոպա Սաֆարյան, Սալբի Ղազարյան, Թեւան Պողոսյան' ԱՄՆ դեսպանի հետ հանդիպման-զրույցի, կարծիքների փոխանակման:

Դեսպան Հեֆերնը, մինչ հրապարակելը, նրանց է ներկայացրել Ուորլիքի 6 կետից բաղկացած հայտարարության տեքստը եւ փորձել է ճշտել փորձագետների, ինչպես նաեւ հանրային արձագանքը դրա առնչությամբ: Ճիշտ է, 6 թեզերը նորույթ չեն, դրանք ներառված են «Մադրիդյան սկզբունքներ» փաստաթղթում, այնուհանդերձ, ըստ մասնակից փորձագետների, ԱՄՆ-ն մտավախություն ունի, որ Ռուսաստանն Ադրբեջանի հետ ցանկանում է փոխել ՄԽ ֆորմատը, եւ որ կողմերից որեւէ մեկը, մասնավորապես Ադրբեջանը, կարող է հրաժարվել «մադրիդյան» սկզբունքներից՝ հետ քաշվելով բանակցային սեղանից, հատկապես ուկրաինական եւ ղրիմյան զարգացումներից հետո: ԱՄՆ-ի նպատակն է' կողմերին հիշեցնել իրենց ստանձնած պարտավորությունները: Ի դեպ, մեր տեղեկություններով, այդ նույն օրը, նույն օրակարգով Ադրբեջանում էլ ԱՄՆ դեսպան Մորնինգսթարն է նույնպիսի հանդիպում ունեցել ադրբեջանցի փորձագետների հետ:

Թերթի աղբյուրների փոխանցմամբ' ԱՄՆ-ն անհանգստացած է այն հանգամանքով, որ ֆորմատային եւ այլ «փոփոխությունների» արդյունքում Ռուսաստանը կարող է խաղաղապահներ մտցնել Ղարաբաղ' վրացական բլից-կրիգի տարբերակով, ինչն իրենք խիստ անթույլատրելի են համարում: Ի դեպ, նախորդ օրն արդեն ադրբեջանական փորձագիտական կողմը հայտարարել էր բլից-կրիգի հնարավորության մասին:

Շարունակությունը' «Հրապարակ»-ի այսօրվա համարում: