Արարատյան հայրապետական թեմը դրամական աջակցություն ցուցաբերեց 300-ից ավելի ազատամարտիկի

Արարատյան հայրապետական թեմում մեկնարկեց «Մենք մեր զինվորի կողքին ենք» խորագրով բարեգործական միջոցառումը, որին ներկա էին Հայաստանի պաշտպանության նախարար Սեյրան Օհանյանը և Արարատյան թեմի առաջնորդ Նավասարդ արքեպիսկոպոս Կճոյանը: Բարեգործությունը մեկնարկել է փետրվարի 15-ին Սուրբ Սարգիս զորավարի տոնի առթիվ: Այդ ժամանակ կազմակերպվել էին տոնական միջոցառումներ և զորամասեր այցելությունների հետ մեկտեղ' բարեգործ ական ճաշկերույթ, որի ժամանակ հանգանակվել է 50 միլիոն դրամ:

Օգնությունը տրամադրվել է ՀՀ ՊՆ սոցիալական բաժնի ցուցակներում ընդգրկված 302 ընտանիքի:

«Արմենպրես»-ի փոխանցմամբ, Նավասարդ արքեպիսկոպոս Կճոյանը շեշտեց, որ ծրագիրը լինելու է շարունակական: Նախարար Օհանյանի առաջարկությամբ հաջորդ տարի կազմակերպվելիք հանգանակությունը տրամադրվելու է բանակում վիրավորված զինվորների ապաքինմանը: Նախարար Օհանյանն էլ կարևորեց բանակ-հասարակություն-եկեղեցի կապը' հավելելով, որ նման միջոցառումներն ու հանդիպումները փաստում են' առօրյա խնդիրների լուծումը հնարավոր է միայն հոգևոր աջակցության միջոցով:

Միջոցառման ավարտին դրամական աջակցությունը ստացան մի շարք անապահով ընտանիքներ: