«Վանդակից» դուրս մարդուն հաջողվում է լինել հավասարապես սիրված

Լուսանկարիչը ոչ միայն մասնագիտություն է, այլ մարդկային կերպ, իսկ երբ պարզվում է, որ տվյալ լուսանկարիչը լեգենդի է նկարել, ավելին՝ ընկերություն են արել, չզրուցել նրա հետ անհնար է: Այդպիսի հետաքրքիր և կոլորիտային յուրօրինակ կերպար է վրաստանաբնակ Յուրի Մեչիտովը, ով եղել է Փարաջանովի անձնական լուսանկարիչը: Փիլիսոփայական մտքերով, պրագմատիկ և ուրախ մարդը իրեն համարում է բոլոր ազգություններից դուրս:

-Ինձ շատ են ցույց տալիս Վրաստանի հեռուստատեսությամբ, հաճախ եմ խոսում քաղաքականության փիլիսոփայության և այլ հարցերի շուրջ,- նշեց Լուրեր.com-ի զրուցակիցը,- երևի այդ պատճառով է, որ վրացիներն ուզում են ես հայ լինեմ, որ իմ օրինակով ասեն, տեսնում եք՝ հայերն ինչ ազատ են ապրում, ինչ ուզում խոսում են,- ժպտալով հավելեց նա:

Գրական ստեղծագործական աշխատանքով զբաղվող Մեչիտովը ժամանակ առ ժամանակ խոհափիլիսոփայական ակնարկներ է գրում, ուստի փիլիսոփայորեն է մոտեցել նրան, որ ընդամենը ամիս ու կես է կարողացել աշխատել Վրաստանի մշակույթի նախարարի տեղակալ: Մարդը իռացիոնալ էակ է,- կարծում է մեր զրուցակիցը,- և մարդու ճակատագիրը կտրուկ կփոխվի, երբ գիտակցի դա: Իսկ քանի դեռ ոչ ոք չի գիտակցում, բացի իրենից, նա իրեն համարում է համընդհանուր վանդակից դուրս անձնավորություն:

Սոցիալական ցանցերում էլ ներկայացված չէ, քանի որ չի ուզում ընկերանալ նրանց հետ, ովքեր ժամը մեկ դնում են իրենց այդ պահին կերած ուտելիքների նկարները: Ազատ ու անկաշկանդ լուսանկարչին Թբիլիսիում բոլորը գիտեն, նրա գրած ստեղծագործությունները պարբերաբար դառնում են բուռն քննարկումների առարկա, իսկ լուսանկարները դուրս են որևէ քննադատությունից: Թեև չունի կրոնական պատկանելիություն, բայց չի ժխտում Աստծո գոյությունը նա սպասված հյուր է նաև Վրաստանի հոգևոր աշխարհի ներկայացուցիչների համար: Նրան ընդունում են նաև Վրաստանում Հայաստանի Հանրապետության դեսպանատան ներկայացուցիչները, իսկ նախկին դեսպան Հովհաննես Մանուկյանի հետ բացի ընկերական հարաբերություններից, ունի նաև հետաքրքիր հուշեր:

-Փարաջանովի մասին գիրք եմ հրապարակել,- ասաց մեր զրուցակիցը,- այ եթե Հովհաննես Մանուկյանը մի 30 օրինակ առներ, կպատմեի մի քանի լավ հուշ, բայց հիմա չեմ ասի,- Մեչիտովյան սրամտությամբ ավարտեց մեր հյուրը:

Ի դեպ ենթադրում ենք, որ խոսքը հենց այն գրքի մասին է, որը վերջերս ՀՀ արդարադատության նախարար Հովհաննես Մանուկյանը նվիրեց դերասան Վարդան Պետրոսյանին: