Երկրապահն այն մարդն է, ով նպաստում է պետության ամրապնդմանը

Լուրեր.com-ը զրուցել է ԵԿՄ վարչության փոխնախագահ Ղուկաս Ուլիխանյանի հետ, պարզելու համար, թե իրականում ինչպես է նշվել ԵԿՄ վարչության նախագահ, Արցախի հերոս, գներալ-լեյտենանտ Մանվել Գրիգորյանի ծննդյան 58-րդ տարեդարձը:

- Պարոն Ուլիխանյան, գեներալը մե՞ծ արարողություն էր կազմակերպել:

- Զորավարի ծննդյան 58-րդ տարեդարձի նշումը ԵԿՄ նախաձեռնությունն էր: Մանվել Գրիգորյանի ծննդյան օրը երկրապահական ընտանիքում տոնական օր է, եւ մենք մեր ավանդական տոնական միջոցառումն էինք կազմակերպել:

- Իսկ ովքե՞ր էին ներկա միջոցառմանը, ի՞նչ երեւելիներ:

- Միջոցառմանը մասնակցում էին երկրապահներ' անկախ քաղաքական համոզումներից, կողմնորոշումներից: Զորավարի ծննդյան օրը երկրապահական տոն է: Երկրապահն այն մարդն է, ով գիշեր ու զօր մտածում է երկրին, ազգին, հայրենիքին, պետությանը պիտանի լինելու մասին: Երկրապահ են մերօրյա ազատամարտի հերոսները, երկրապահ են տարբեր ոլորտների մասնագետները, մտավորականները, ռամիկն ու շինականը: Երկրապահն այն մարդն է, ով իր տեղում շարունակաբար աջակցում է ազգի, ժողովրդի բարօրությանը, նպաստում է պետության ամրապնդմանը:

- Կան խոսակցություններ, որ միջոցառմանը ներկա են եղել շատ բարձրաստիճան այրեր, ներառյալ` ՀՀ նախագահ Սերժ Սարգսյանը:

- ՀՀ նախագահը երկրապահ է: Նա միշտ եւ բոլոր հարցերում սատարում է Երկրապահ կամավորականների միությանը: Նույն կերպ միջոցառմանը ներկա էր երկրապահ, պաշտպանության նախարար Սեյրան Օհանյանը, երկրապահ, Զորավարի մարտական ընկեր, առհասարակ' լավ ընկեր, Արցախի փոխվարչապետ Արթուր Աղաբեկյանը: Բոլոր ներկաներն էլ հայ ազգի դարդուցավով ապրող երկարպահ մարդիկ են եղել: