Եթե վախենում էին, որ Լևոն Հայրապետյանը կփախչի, թող տանկ տեղադրեին նրա հիվանդասենյակի առաջ. Զորի Բալայան

Հայազգի գործարար և բարերար Լևոն Հայրապետյանը Մոսկվա մեկնելուց մի քանի օր առաջ լյարդի ծանր վիրահատություն է տարել և դեռևս չի հասցրել ապաքինվել: «Արմենպրես»-ի հետ զրույցում Հայրապետյանի ընկերներից գրող և հրապարակախոս Զորի Բալայանն ասաց, որ Հայրապետյանի առողջական վիճակը շատ վատ է, քանի որ շաքարային դիաբետի պատճառով նրա առողջությունը քայքայվել է, իսկ վերջերս տարած լյարդի վիրահատությունից էլ դեռ չի հասցրել կազդուրվել:

«Իմ միակ անհանգստությունն այն է, որ նա ողջ մնա: Նա գրեթե մահամերձ վիճակում է, ես չեմ չափազանցնում, նրա առողջական վիճակն, իրոք, շատ վատ է և գլխավոր հարցը, որ պետք է բարձրացնել այն է, որ կալանավայրում նրան հսկի բժիշկը: Հաշվի առնելով նրա առողջական վիճակը, նրան ընդհանրապես չպետք է ձերբակալեին: Նա պետք է կազդուրվի, իսկ եթե վախենում էին, որ Լևոնը կփախչի, թող տանկ տեղադրեին նրա հիվանդասենյակի առաջ»,- ասաց Բալայանը' հավելելով, որ Հայրապետյանի դեմ հարուցված գործն ու այս ամբողջ պատմությունը շատ խճճված է և մի շարք փաստեր չեն համապատասխանում իրականությանը:

Բալայանը շեշտեց, որ նա ոչ թե Մոնակոյից է վերադարձել Մոսկվա, այլ Երևանից: Թե ինչու են Ռուսաստանում սխալ տեղեկատվություն տարածում՝ Բալայանը չպատասխանեց: «Եթե լրատվամիջոցները ցանկանում են օգնել Լևոնին, ապա պետք է շատ խոսեն նրա առողջական վիճակի մասին, մնացած հարցերում իրեն ոչ ոք չի կարող օգնել: Միայն Լևոնը կարող է իր հարցերը կարգավորել»,- ասաց Բալայանը: