Հայաստանն այս տարի անպայման կանդամակցի ԵՏՄ-ին. Իվան Վոլինկին

Հայաստանում Ռուսաստանի արտակարգ և լիազոր դեսպան Իվան Վոլինկինը համոզված է, որ Հայաստանի՝ Եվրասիական տնտեսական միությանն անդամակցելու հարցում չկան քաղաքական խոչընդոտներ: Անդամակցության հարցը ձգձգվում է հիմնականում տեխնիկական խնդիրների պատճառով և դրանք հարթելուց հետո այս տարվա ընթացքում Հայաստանը կանդամակցի տնտեսական այդ կառույցին: «Այս տարի առանց որևէ կասկածի Հայաստանը կանդամակցի: Չեմ կարող ժամկետներ նշել ու նաև հավաստիացնել, որ հարցը վերաբերում է բացառապես տեխնիկական խնդիրներին, սակայն այստեղ քաղաքականություն չկա, ամեն ինչ գնում է ըստ ծրագրի և, ես համոզված եմ, որ համաձայնագիրը կստորագրվի այն տեսքով և պայմանով, որը ձեռնտու կլինի Հայաստանին և ԵՏՄ անդամ մնացած պետություններին»,- «Արմենպրես»-ի հաղորդմամբ' լրագրողների հետ զրույցում ասաց Իվան Վոլինկինը:

Եվրասիական տնտեսական միությունը վերպետական տնտեսական կառույց է, որի անդամներն են Ռուսաստանը, Բելառուսը, Ղազախստանը: Մայիսի 29-ին Աստանայում վերոնշյալ երեք պետությունների ղեկավարներն ստորագրեցին համաձայնագիր ԵՏՄ ստեղծման վերաբերյալ: Հայաստանի անդամակցության վերաբերյալ տարբեր ժամկետներ են ներկայացվում: Հուլիսի 17- ին ՀՀԿ ԳՄ նիստից առաջ լրագրողների հետ զրույցում ՀՀ վարչապետ Հովիկ Աբրահամյանը նշել է, որ մինչև հոկտեմբերի վերջ Հայաստանը կանդամակցի ԵՏՄ-ին: