Սոնա Ռուբենյանը «Նոր ալիք» մրցույթից առաջ մասնակցում է նաև վարպետության դասերի

«Նոր ալիք» երիտասարդ կատարողների միջազգային մրցույթում այս տարի Հայաստանը ներկայացնող երգչուհի Սոնա Ռուբենյանը մեծ ուրախությամբ է պատրաստվում հեղինակավոր մրցույթին: Լատվիայում գտնվող երգչուհին «Արմենպրես»-ի թղթակցի հետ հեռախոսազրույցում նշեց, որ մրցույթի մասնակիցները շատ փորձեր են ունենում:

«Շատ լավ տրամադրություն ունեմ, որովհետև այստեղ՝ այս դրական մթնոլորտում, այլ կերպ ուղղակի չի կարող լինել: Շատ փորձեր ենք ունենում՝ առավոտյան ժամը 11-ից մինչև երեկո, սակայն խիստ հետաքրքիր է, որովհետև ամեն օր մի վարպետության դասի ենք մասնակցում, ականատես լինում և հենց ինքներս զգում ենք մեր մեջ դրական փոփոխություններ»,- նշեց Սոնա Ռուբենյանը:

Երգչուհին նաև տեղեկացրեց, որ մրցութային երկրորդ օրը հանդես կգա 6-րդ, իսկ երրորդ օրը՝ 13-րդ համարի ներքո: «Իսկ առաջին օրվա հերթականությունը կընտրեն ռուսական շոուբիզնեսի աստղերը»,- տեղեկացրեց Ռուբենյանը:

Մրցույթը Յուրմալայում այս տարի կանցկացվի հուլիսի 22-27-ը: Այն հայ ակնդրի համար կհեռարձակի «Շանթ» հեռուստաընկերությունը: Մրցութային համերգների հեռարձակումից բացի նախատեսվում է ցուցադրել օրագրեր, որոնք հեռուստադիտողին հնարավորություն կընձեռեն ավելի լավ պատկերացում կազմել մրցույթի շրջանակներում հայ պատվիրակի առօրյայի մասին: Մրցույթի կանոնադրության համաձայն' մասնակիցը պետք է ներկայանա երեք երգով՝ միջազգային հիթ, երկրի հիթ և սեփական երգ: Երաժշտական պրոդյուսեր Անդրեն տեղեկացրել էր, որ Սոնան կկատարի Մայլի Սայրուսի «Wrecking Ball»-ը, ինչպես նաև Մհերի հետ կներկայացնի Արմեն Սմբատյանի «Հայաստան» երգը, որը կնվիրվի Հայոց Ցեղասպանության 100-րդ տարելիցին: Հեղինակային երգի երեկոյի ընթացքում կհնչի Ազատ Հակոբյանի «Կարոտ» ստեղծագործությունը: