Ինչու հայրենիք վերադարձած ազատամարտիկը չի կարողանում հայկական անձնագիր ստանալ. պարզաբանում

Համացանցում տեղեկատվություն է տարածվել, թե իբր նախկին ազատամարտիկ Սեյրան Հովսեփյանը 20 տարի Ուկրաինայում ապրելուց հետո վերադառնալով հայրենիք՝ չի կարողանում քաղաքացիություն ձեռք բերել, և քանի որ ուշացրել է 50.000 դրամ տուգանքը վճարել՝ պետք է վտարվի երկրից:

Տեղեկատվությունն իրականությանը չի համապատասխանում: Այս մասին ասվում է ոստիկանության հաղորդագրությունում:

2014 թ. ապրիլի 26-ին Սեյրան Հովսեփյանը ոստիկանության Արարատի անձնագրային ծառայության միջոցով դիմել է ոստիկանության անձնագրային և վիզաների վարչություն՝ ՀՀ քաղաքացի ճանաչվելու խնդրանքով: Ուսումնասիրության արդյունքում պարզվել է, որ նա համարվելով այլ երկրի քաղաքացի՝ պետք է սահմանված կարգով դիմի Հայաստանի Հանրապետության քաղաքացիություն ստանալու (անձը ՀՀ քաղաքացիություն ստանում է ՀՀ Նախագահի հրամանագրով քաղաքացիություն շնորհելու հիմքով), այլ ոչ քաղաքացի ճանաչվելու խնդրանքով: Հայաստանի Հանրապետության քաղաքացիություն ստանալու համար անհրաժեշտ է դիմել ՀՀ ոստիկանության անձնագրային և վիզաների վարչություն՝ ներկայացնելով ՀՀ կառավարության 2007 թվականի նոյեմբերի 11-ի թիվ 1390-Ն որոշմամբ նախատեսված փաստաթղթերը:

«Օտարերկրացիների մասին» ՀՀ օրենքի համաձայն՝ այն պետությունների քաղաքացիները, որոնց համար սահմանված է Հայաստանի Հանրապետություն ժամանելու առանց մուտքի վիզայի ռեժիմ, Հայաստանի Հանրապետության տարածքում կարող են մնալ առավելագույնը 180 օր ժամկետով՝ մեկ տարվա ընթացքում: Հաշվի առնելով այն հանգամանքը, որ Ս. Հովսեփյանը Հայաստանի Հանրապետության տարածքում գտնվելու ժամանակահատվածում դիմել է Հայաստանի Հանրապետության քաղաքացի ճանաչվելու խնդրանքով և նրա դիմումին պատասխան է տրվել 2014 թվականի մայիս ամսին, 180-օրյա ժամկետի հաշվարկը հաշվարկվում է դիմումին պատասխանելու պահից սկսած: Հետևաբար, Ս. Հովսեփյանի նկատմամբ վարչական պատասխանատվության ենթարկելու վարույթ չի սկսվել: