«Կիևը երկրի արևելքի նկատմամբ վերահսկողությունը կվերադարձնի քաղաքական ճանապարհով». Ուկրաինայի ԱԳՆ

Ուկրաինայի իշխանությունները մտադիր են աշխարհազորայինների կողմից վերահսկվող քաղաքների նկատմամբ հսկողությունը վերադարձնել «քաղաքական գործընթացների միջոցով» և պատրաստ են տարածաշրջաններին տրամադրել «շատ ավելի մեծ ազատություն»: Այդ մասին, ինչպես տեղեկացնում է «Արմենպրես»-ը, Reuters գործակալությանը տված հարցազրույցում հայտարարել է հանրապետության արտաքին գործերի նախարար Պավել Կլիմկինը:

Հուլիսի 29-ին CNN հեռուստաալիքը, վկայակոչելով ԱՄՆ-ի հետախուզական աղբյուրներ, հաղորդել էր, որ Ուկրաինայի ուժայիններն արևելքում մարտական գործողությունների ընթացքում սկսել են օգտագործել փոքր հեռահարության բալիստիկ հրթիռներ: Դա ամենաավերիչ զենքն է, որը մինչ այժմ կիրառվել է հակամարտության մեջ: Վերջին ժամանակներս Դոնեցկ, Լուգանսկ և Գոռլովկա քաղաքներն ամենաթեժ կետերն են դարձել. դրանք պարբերաբար ենթարկվում են գնդակոծումների:

«Մենք հարվածներ չենք հասցնելու այդ քաղաքներին»,-հայտարարել է Կլիմկինը, խոսելով Դոնեցկի ու Լուգանսկի մասին, որոնք այժմ գտնվում են աշխարհազորայիների վերահսկողության ներքո: Նա նշել է, որ, վերջին հաշվով, միայն քաղաքական որոշումը կնպաստի հակամարտության կարգավորմանը երկրի արևելքում: ԱԳ նախարարի խոսքով՝ Կիևի իշխանությունները քաղաքների նկատմամբ հսկողություն կհաստատեն «ոչ թե քաղաքները գնդակոծելու, այլ քաղաքական գործընթացների միջոցով»:

Նա նաև պաշտպանել է երկրի արևելքում հակամարտության կարգավորման հարցերին նվիրված նոր միջազգային խորհրդաժողով անցկացնելը և հայտարարել, որ Կիևը պատրաստ է տարածաշրջաններին տրամադրել «շատ ավելի մեծ ազատություն»: Կլիմկինն ասել է, որ խորհրդաժողովի անցկացման հարցն ինքը նախօրյակին քննարկել է ԱՄՆ-ի պետքարտուղար Ջոն Քերիի հետ իր հանդիպման ընթացքում, հաղորդել է ՌԻԱ Նովոստին: