Ուղիղ 70 տարի առաջ հետախուզական թռիչքից չվերադարձավ Անտուան դը Սենտ Էքզյուպերին

Ուղիղ 70 տարի առաջ հետախուզական թռիչքից չվերադարձավ Ֆրանսիայի ամենահռչակավոր օդաչուներից և գրողներից մեկը՝ Անտուան դը Սենտ Էքզյուպերին, տեղեկացնում է «Արմենպրես»-ը:

1944 թվականի հուլիսի 31-ին ամերիկյան Lightning P-38 ինքնաթիռի ղեկանվի առջև նա պետք է կատարեր Սավոյայի այն շրջանների օդալուսանկարահանում, որտեղով պետք է առաջ շարժվեին հակաֆաշիստական կոալիցիայի զորքերը՝ Միջերկրական ծովի ափ իջնելուց հետո: Ինքնաթիռը կորել է: Շատ տասնամյակներ հայտնի չէր նույնիսկ դրա ընկնելու մոտավոր վայրը: Այն պատահականորեն հայտնաբերվել է 1998 թվականին Մարսելի մերձակայքում, երբ ձկնորսների ցանցերը ծովի հատակից հանել են այն շղթա-ապարանջանը, որի վրա փորագրված են եղել Սենտ Էքզյուպերի և նրա կնոջ՝ Կոնսուելոյի անունները:

Ուղևորվելով վերջին թռիչքի՝ Սենտ Էքզյուպերին ասել է. «Եթե ինձ խփեն, ես իմ կյանքում ոչ մի բանի համար չեմ ափսոսա»: Նրա ինքնաթիռի բեկորներն, ինչպես հավաստել են փորձագետները, գտնվել են այն շրջանում, որտեղ նա ընդհանրապես չպետք է լիներ, որովհետև մարտական առաջադրանքը վերաբերել է Ֆրանսիայի բոլորովին այլ շրջանի: Դրա պատճառները հասկանալի չեն: Կամ Սենտ Էքզյուպերին շրջանցել է վատ եղանակի գոտին, կամ էլ Սավոյայի ուղղությամբ հանդիպել է զենիթահար թնդանոթների հուժկու կրակի և որոշել է դրա փոխարեն լուսանկարել ափի գերմանական ամրակառույցները: &nbs p;

Մինչ օրս շարունակվում են վեճերը. կա՛մ նրան խփել են, կա՛մ 44-ամյա օդաչուն և գրողը, որը վաղուց էր տառապում դեպրեսիայից և կյանքի ու սիրային հիասթափություններից, վերջ է տվել կյանքին:

Ինքնաթիռի բեկորներն ի պահ են տրվել Փարիզի մերձակա Բուրժեի Ավիացիայի թանգարանին, հաղորդել է ԻՏԱՌ-ՏԱՍՍ գործակալությունը: