«Հրապարակ». Աշտարակի ավագանու անդամներն այս անգամ էլ դեմ գնացին քաղաքապետի առաջարկին

Ինչպես երեկ, թերթը տեղեկացրել էր՝ օգոստոսի 5-ին պետք է տեղի ունենար Աշտարակի ավագանու նիստը, որը, դարձյալ ըմբոստ ավագանու ջանքերով, ենթադրվում էր, որ կանցներ թեժ մթնոլորտում։ Ըստ թերթի տեղեկությունների՝ նիստում պետք է կրկին քննարկվեր հողատարածքներն աճուրդի հանելու հարցը։ Նշենք, որ անցյալ անգամվա աղմկահարույց նախագիծը, որով նախատեսում էին աճուրդի հանել շուրջ

1300 քմ հողատարածք, որը, ըստ որոշ տեղեկությունների, վերջում բաժին էր հասնելու Սերժ Սարգսյանի թիկնազորի պետի մտերիմին՝ գազալցակայան կառուցելու համար, ավագանու համառ ջանքերով մերժվեց։ Այս անգամ էլ նախագծով առաջարկվում էր ոչ թե մեկ, այլ մի քանի հողատարածքներ աճուրդի հանել, որոնց ընդհանուր մակերեսն անցնում էր 100 հեկտարից։

Ինչպես եւ սպասվում էր, նախագիծը քննարկվեց երեկվա նիստում, եւ կրկին ավագանին դեմ արտահայտվեց։ Բանն այն է, որ այդ հողատարածքները գյուղատնտեսական նշանակության են եւ վաճառվում են բավական ցածր գնով, բայց չի բացառվում, որ դրանք աճուրդի միջոցով ջրի գնով գնվեն տարբեր օլիգարխների կամ գործարարների կողմից ու հետո վերավաճառվեն ուրիշներին՝ նկատելիորեն բարձր գնով։ Արդյունքում՝ չնչին գումարներ մուտք կարվեն քաղաքի համայնքային բյուջե, իսկ մի քանի հոգի «թվեր» կաշխատեն։

Փաստորեն, ավագանու անդամներն այս անգամ էլ դեմ գնացին քաղաքապետի առաջարկած որոշմանն ու չթույլատրեցին աճուրդի հանել իրենց համայնքին պատկանող հսկայական հողատարածքները։ Ի դեպ, նախորդ նիստում այդ աղմկահարույց «գազալցակայանի նախագծի» չանցնելը ավագանու անդամներն իրենց հաղթանակն էին համարում եւ ընդգծում նաեւ «Հրապարակի» դերակատարությունը։

Շարունակությունը` «Հրապարակ»-ի այսօրվա համարում: