Սահմանամերձ 30 գյուղերի գործարարներ կազատվեն հարկերից. նոր օրինագիծ ԱԺ-ում

Սահմանամերձ գյուղերում արտագաղթը կանխելու համար կառավարությունը սեպտեմբերին Ազգային ժողով կներկայացնի օրենքի նախագիծ, որով սահմանամերձ երեսուն համայնքների գործարարները կազատվեն հարկերից: «Արմենպրես»-ի փոխանցմամբ, այս մասին Ախթալա կատարած այցի ժամանակ լրագրողներին տեղեկացրեց ՀՀ վարչապետ Հովիկ Աբրահամյանը: «Որպեսզի բնակիչները չլքեն իրենց գյուղերը, կարևոր պայման է, որ նրանք աշխատանք ունենան: Այս նպատակով կառավարությունը սկսել է օրենքի նախագծի մշակումը: Թեև դա մեծ կորուստ է բյուջեի եկամուտների մասով, բայց մենք անելու ենք այդ քայլը»,- ասաց վարչապետը:

Հովիկ Աբրահամյանը խոսեց նաև վերջին շրջանում սահմանին մոտ գտնվող գյուղերի ուղղությամբ կրակոցների և առաջացած լարվածության մասին, ինչը հակառակորդի կողմից հրադադարի ռեժիմը խախտելու հետևանք է: «Մենք սահմանամերձ գյուղերի բնակիչներին համարձակության կոչ անելու խնդիր չենք տեսնում, քանի որ նրանք ամբողջությամբ պատկերացնում են, թե ինչ մեծ բեռ է դրված իրենց ուսերին: Նրանք լավ են հասկանում, որ ազգանպաստ մեծ գործ են կատարում' պահպանելով Հայաստանի սահմանները»,- նշեց նա:

ՀՀ վարչապետն ասաց, որ Հայաստանի ռազմական դաշնակիցներին դիմելու կարիք դեռ չկա' նրանց հետ ստեղծված իրավիճակը քննարկելու համար: Նա նաև համոզմունք հայտնեց, որ Ադրբեջանի կողմից հրադադարի խախտումը պայմանավորված է երկու երկրների նախագահների' Սոչիում կայանալիք հանդիպումով:

«Փորձը ցույց տվեց, որ ադրբեջանցիներն ավելի մեծ կորուստներ են կրում: Վերջին օրերի միջադեպերի արդյունքում հակառակորդն ութ անգամ ավելի կորուստներ ունեցավ, բայց դա մենք չենք համարում հպարտանալու առիթ, քանի որ մեր յուրաքանչյուր զինվորի կյանքը մեզ համար չափազանց կարևոր է»,- ընդգծեց վարչապետը: