Չինարիում, Մովեսում և Ներքին Կարմիրաղբյուրում իրավիճակը ներկայումս հանդարտ է

Տավուշի սահմանամերձ մի քանի համայնքներում իրավիճակը ներկայում խաղաղ է, կրակոցներ չեն հնչում: Այս մասին «Արմենպրես»-ի հետ զրույցում նշեցին սահմանապահ համայնքների ղեկավարները: «Իրավիճակը նորմալ է, բանակը զգոն կանգնած է՝ ուժեղացված հենակետերով: Այսօր կրակոց չի եղել, երեկ երեկոյան քիչ քանակությամբ են կրակել գյուղի ուղղությամբ»,- ասաց Չինարիի գյուղապետ Սամվել Սաղոյանը՝ հավելելով, որ հակառակորդը կրակում է իր գոյությունն ապացուցելու համար:

Ներքին Կարմիրաղբյուրի գյուղապետ Մանվել Կամենդատյանը ևս հայտնեց, որ ներկայում իրավիճակը հանգիստ է գյուղում: «Երեկ գիշեր են ինտենսիվ կրակել՝ մոտ 3-4 ժամ»,- նշեց Կամենդատյանը:

Մովսես համայնքի ղեկավար Արարատ Ավալյանն էլ տեղեկացրեց, որ ներկայում դադարել է կրակը, բայց օրվա ընթացքում կրակել են, որի պատճառով գյուղում տեղադրված հեռուստաալիքների հեռարձակումն ապահովող կայանում հրդեհ է բռնկվել: «Գյուղապետի տեղակալի ներկայությամբ երիտասարդները արագ հանգցրել են հրդեհը, ոչ մի վնաս կայանը չի կրել »-հայտնեց Արարատ Ավալյանը:

Նրա խոսքով՝ հակառակորդն իր կրակոցներով խախտել է գյուղի անդորրը երեկ գիշերը ժամը 23:00-01:30 ընկած ժամանակահատվածում: «Մինչև մերոնք նրանց «աչքը չեն հանում», չեն դադարում կրակել»,-ավելացրեց գյուղապետը:

Ադրբեջանական կողմը անընդհատ կրակ է բացում սահմանամերձ գյուղերի ուղղությամբ՝ խաթարելով խաղաղ բնակչության առօրյան: Հակառակորդը հատկապես ակտիվանում է գյուղատնտեսական աշխատանքների եռուն շրջանում: