Քաղաքագետը Սոչիի հանդիպման հետ մեծ հույսեր չի կապում

Սահմանին տիրող լարված իրավիճակը, Ադրբեջանի ռազմաքաղաքական վերնախավի' անընդհատ ապակայունացնելու, իրավիճակը սրելու ցանկություններն ու Ադրբեջանի նախագահ Իլհամ Ալիեւի twitter-յան գրառումները հիմք են տալիս «Եվրոպական ինտեգրացիա» հասարակական կազմակերպության ղեկավար Կարեն Բեքարյանին կարծիք կազմելու, որ օգոստոսի 9-ին Սոչիում կայանալիք Վլադիմիր Պուտին-Սերժ Սարգսյան եւ Վլադիմիր Պուտին-Իլհամ Ալիեւ հանդիպումը ԼՂ հակամարտության կարգավորման հարցում որեւէ արդյունք չի բերի:

«Սահմանին իրավիճակը շարունակում է մնալ լարված: Ադրբեջանը որեւէ նշան չի տալիս, որ պատրաստ է խաղաղության, ընդհակառակը, ավելի է սրում իրավիճակ: Հայ գերու սպանությունը նույնպես իրավիճակը սրելու եւ հերթական անգամ մարդտյացության դրսեւորում էր: Եվ չեմ կարծում, որ այս իրավիճակում Սոչիում կայանալիք հանդիպումից կարելի է ունենալ ակնկալիքներ եւ դրական զարգացումների հույս»,- «Արմենպրես»-ի հետ զրույցում ասաց Կարեն Բեքարյանը:

Հայաստանի Հանրապետության Նախագահ Սերժ Սարգսյանն օգոստոսի 8-ին աշխատանքային այցով մեկնել է Ռուսաստանի Դաշնություն, քաղաք Սոչի: Օգոստոսի 9-ին կկայանա Հայաստանի Հանրապետության Նախագահի հանդիպումը Ռուսաստանի Դաշնության Նախագահ Վլադիմիր Պուտինի հետ: Հայկական կողմը պատրաստակամություն է հայտնել այցի շրջանակում անցկացնել նաև եռակողմ հանդիպում' Ռուսաստանի Դաշնության և Ադրբեջանական Հանրապետության նախագահների հետ' քննարկելու համար ղարաբաղյան հակամարտության խաղաղ կարգավորման խնդիրները, ինչպես նաև վերջին օրերին Ադրբեջանի կողմից հրահրած լարման արդյունքում ստեղծված իրավիճակը: Ըստ ՌԴ նախագահի պաշտոնական կայքի, հանդիպմանը Սերժ Սարգսյանն ու Վլադիմիր Պուտինը կքննարկեն երկու երկրների հետագա քաղաքական, առեւտրատնտեսական եւ հումանատար համագործակցության զարգացման հարցերը: Նախագահները հատուկ ուշադրություն կդարձնեն Հայաստանի' Եվրասիական տնտեսական միությանն անդամակցելու հարցին: Ադրբեջանի նախագահի հետ առանձին հանդիպմանը կողմերը կքննարկեն ռուս-ադրբեջանական համագործակցությունը, կհամաձայնեցվեն մի քանի նախաձեռնություններում համատեղ գործողությունների ծրագիրը, որոնք կվերա բերվեն էներգետիկային, ներդրումային եւ միջտարածաշրջանային համագործակցությանը: