«ՀՀ Նախագահը հստակ ամրագրեց, որ ադրբեջանական քարոզչությունը ՄԱԿ-ի ԱԽ բանաձևերը վկայակոչելով` որևէ հաջողության չի հասնի». փորձագետ

Սոչիում կայացած հանդիպման ընթացքում Հայաստանի Հանրապետության նախագահ Սերժ Սարգսյանը հստակ ամրագրեց այն դրույթը, որ Լեռնային Ղարաբաղի հակամարտության կարգավորմանն ուղղված ՄԱԿ-ի անվտանգության խորհրդի ընդունած բանաձևերում խոսվում է ոչ միայն Հայաստանի, այլ նաև Ադրբեջանի պարտականությունների մասին, որոնցից ոչ մեկ Ադրբեջանը չի կատարել: Այս մասին «Արմենպրես»-ի հետ զրույցում ասաց ԵՊՀ ադրբեջանական ուսումնասիրությունների կենտրոնի ղեկավար Միհրան Հակոբյանը՝ անդրադառնալով Սոչիում Հայաստանի, Ռուսաստանի և Ադրբեջանի նախագահների հանդիպմանը: «Բարձր եմ գնահատում մեր նախագահի ելույթը, քանի որ նա, պատասխանելով Ադրբեջանի նախագահ Իլհամ Ալիևին, հստակ ֆիքսեց, որ ՄԱԿ-ի անվտանգության խորհրդի ընդունած բանաձևերում պարտականություններ ունի նաև Ադրբեջանը, որը դրանցից ոչ մեկը չի կատարել: Նախագահը հասկացրեց, որ ադրբեջանական քարոզչությունն այս ուղղությամբ ոչ մի հաջողություն չի կարող գրանցել»,- «Արմենպրես»-ի հաղորդմամբ՝ ասաց նա:

Միհրան Հակոբյանը նշեց, որ ընդհանուր առմամբ կարելի է դրական գնահատել հանդիպումը, հատկապես, երբ այն կայանում է սահմանին առկա լարվածության պայմաններում, սակայն չցանկացավ կանխատեսումներ անել՝ կթեթևանա սահմանային լարվածությունն այս հանդիպումից հետո, թե ոչ: «Ես կարծում եմ, որ նման հարցերում կանխատեսումներ անելը անշնորհակալ գործ է: Չեմ կարծում, որ այս պահին որևէ մեկը կարող է հստակ հայտարարել, որ սահմանին լարվածությունը կթեթևանա կամ ավելի կակտիվանա, քանի որ չկա որևէ հայտարարություն, չկա երկու կողմերից նման համաձայնության վերաբերյալ համատեղ հայտարարության տեքստ: Ուղղակի հարկավոր է սպասել և տեսնել, թե ինչ կասի մեր նախագահը»,- նշեց նա: