Տավուշի մարզպետարանը կլուծի առանց կացարան մնացած այգեպարցիների բնակարանային խնդիրը (լուսանկար)

Տավուշի մարզի Այգեպար գյուղի երկու ընտանիքներ, որոնք ադրբեջանական զինուժի կողմից այրող փամփուշտներով հայկական բնակավայրերը կրակի տակ պահելու հետևանքով զրկվել են տներից, շուտով աջակցություն կստանան: Տավուշի մարզպետարանի աշխատակազմի ղեկավարի տեղակալ Ֆելիքս Ափինյանն «Արմենպրես»-ի հետ զրույցում տեղեկացրեց, որ բնակիչներին աջակցելու համար քայլեր ձեռնարկելու ուղղությամբ մարզպետի կողմից համապատասխան հանձնարարություն ունի:

«Այրված երկու տների բնակիչներին օգնելու հարցն ընթացքի մեջ է, և համապատասխան փաստաթղթեր պատրաստելու հանձնարարություն ունեմ: Այժմ Այգեպարի գյուղապետի կարգադրությամբ հանձնաժողով է ստեղծվել: Տուժած բնակիչներին պիտի աջակցեն: Պիտի փորձենք լուծել նրանց բնակարանային խնդիրը, քանի որ երկուսի տներն էլ ամբողջությամբ վառվել են: Ինձ թվում է, որ հարցը կլուծվի և այդպես չի թողնվի»,-նշեց Ափինյանը:

Տավուշի մարզպետարանի աշխատակազմի ղեկավարի տեղակալն ընդգծեց, որ դեռևս հայտնի չէ, թե երբ կլուծվի այս խնդիրը: «Չգիտեմ՝ ինչքան ժամանակում կլուծվի հարցը, որովհետև ՀՀ կառավարությունը պետք է գումար առանձնացնի: Նման դեպքերում միշտ օգնում են: Տավուշում դեպք չի եղել, որ չաջակցեն»,-նշեց նա:

Օգոստոսի 11-ին հայտնի դարձավ նաև, որ ընտանիքին օգնելու համար «Կոնվերս» բանկում հաշվեհամար է բացվել: Ցանկացողները կարող են գումար փոխանցել 1930044804170100 հաշվեհամարին:

ՀՀ արտակարգ իրավիճակների նախարության փրկարար ծառայություն օգոստոսի 10-ին` ժամը 04.20-ին, ահազանգ է ստացվել, որ հրդեհ է բռնկվել Տավուշի մարզի Այգեպար գյուղի տներից մեկում: Ինչպես «Արմենպրես»-ին տեղեկացրին նախարարությունից, դեպքի վայր է մեկնել մեկ մարտական հաշվարկ: Ճանապարհի վտանգավոր լինելու պատճառով, դեպքի վայրից մոտ 600 մ հեռավորության վրա, դադարեցրել է ընթացքը և իրականացրել հերթապահություն: Պարզվել է, որ այրվում են 130քմ. մակերեսով Ա. Վ.-ին և 120քմ. մակերեսով Ա. Գ.-ին պատկանող տները: Հրդեհն ինքնամարվել է. տներն ամբողջությամբ այրվել են:

Հրդեհը բռնկվել է ադրբեջանական զինուժի կողմից այրող փամփուշտներով հայկական բնակավայրերը կրակի տակ պահելու հետեւանքով: Իսկ հրշեջ մեքենան չի կարողացել մոտենալ, քանի որ ճանապարհը ևս անընդհատ կրակի տակ է եղել: ՀՀ զինված ուժերի շեշտակի պատասխանից հետո, որը եղել է միայն հակառակորդի դիրքերի ուղղությամբ, կրակը դադարեցվել է: