«Հրապարակ». Ի՞նչ տվեց Սոչիի եռակողմ հանդիպումը

Ղարաբաղաադրբեջանական շփման գծում առկա լարվածության կուլմինացիան կարծես Սարգսյան-Ալիեւ-Պուտին հանդիպումն էր: Գրում է «Հրապարակ»-ը:

Օգոստոսի 10-ին կայացած հանդիպման համառոտ նկարագրությանն ու կցկտուր տեղեկություններին հաջորդեց Սերժ Սարգսյանի հարցազրույցը «Արմնյուզին»: Թե ղարաբաղյան հակամարտության կարգավորման հարցին ինչպես նպաստեց Սոչիի հանդիպումը եւ ինչպես կանդրադառնա այս օրերին սահմանին առկա իրավիճակի վրա, դեռեւս պարզ չէ: Ամեն դեպքում, այդքան սպասված հանդիպումից հետո չեղավ որեւէ կոնկրետ հայտարարություն: Քաղաքագետների ու քաղաքական գործիչների մի ստվար զանգված երեկ ընդհատակ էր անցել, չի բացառվում, որ խուսափում են մեկնաբանել, քանի որ ամեն ինչ դեռ մշուշոտ է: Իշխանական թեւը, հակառակը՝ էյֆորիայի մեջ է. վայելում են Սարգսյանի «համարձակ» ելույթը:

ԱԺ ՀԱԿ խմբակցության ղեկավար Լեւոն Զուրաբյանը, արձագանքելով մեր զանգին, կարճ պատասխանեց. «Ես ավելի եմ կարեւորում շփման գծում կատարված իրադարձությունները, քան թե Սոչիում: Քանի որ Սոչիում ոչ մի արդյունք, ըստ էության, չի հայտարարված կամ հրապարակված: Իսկ այն, ինչ որ կատարվել է շփման գծում, դրա մասին արդեն խոսել ու հայտարարություն ենք տարածել»: Ինչ վերաբերում է սահմանի լարվածության վրա Սոչիի հանդիպման ազդեցությանը, հիշեցրեց. «Լարվածության թուլացման առումով Ադրբեջանի հարձակմանը ՀՀ-ի վերջապես կատարած պատասխանն էր, ինչի մասին Լեւոն Տեր-Պետրոսյանը հրապարակային կոչ արեց»:

Հարցին, թե ոչ իշխանական քառյակը պատրաստվո՞ւմ է այս եռակողմ հանդիպման վերաբերյալ որեւէ հայտարարություն տարածել, պատասխանեց. «Բայց ի՞նչ է եղել, որ հայտարարություն անենք, որեւէ արդյունք կամ պայմանավորվածություն կա՞ր: Ես նորից եմ ասում՝ ուշադիր հետեւել ենք եւ որեւէ հայտարարված արդյունք կամ պայմանավորվածություն չկա, որը կարողանայինք մեկնաբանեինք: Երբ որ լինի, կմեկնաբանենք»:

Շարունակությունը՝ «Հրապարակ»-ի այսօրվա համարում: