Նախարար Գաբրիել Ղազարյանը սկսել է իր մարզային այցելությունները

Նախարար Գաբրիել Ղազարյանն իր խորհրդականների հետ օգոստոսի 11-ին այցելել է Սյունիքի մարզկենտրոն Կապան քաղաք, որտեղ մարզպետի տեղակալ Աշոտ Մարդյանի և մարզպետարանի աշխատակազմի հետ քննարկել է մարզում ֆիզիկական կուլտուրայի և սպորտի զարգացման հիմնախնդիրները: Մարզպետարանի դահլիճում նախարար Ղազարյանը հանդիպել է մարզի սպորտի բնագավառի ներկայացուցիչների հետ, տեղեկացել ոլորտում առկա խնդիրներին և պատասխանել մասնակիցների հարցերին:

Գաբրիել Ղազարյանը եղել է «Կապանի քաղաքի մարմնամարզության մանկապատանեկան մարզադպրոց» և «Կապան քաղաքի Դավիթ Համբարձումյանի անվան մանկապատանեկան մարզադպրոց» ՊՈԱԿ-ներում, ծանոթացել շենքային և գույքային պայմաննե րին, լսել մարզիչների կարծիքն առկա խնդիրների վերաբերյալ:

Օգոստոսի 12-ին՝ Քաջարան քաղաքում, Գաբրիել Ղազարյանը հանդիպել է քաղաքապետ Վարդան Գևորգյանի և նրա աշխատակազմի հետ: Հանդիպմանը ներկա էր նաև Ագարակ քաղաքի քաղաքապետ Մխիթար Զաքարյանը, որն էլ ներկայացրել է իր քաղաքում սպորտի զարգացման ուղղությամբ կատարված աշխատանքները:

Նախարարը Քաջարանի քաղաքապետի հետ եղել է նախարարության ենթակայությամբ գործող «Քաջարանի համալիր մանկապատանեկան մարզադպրոց» ՊՈԱԿ-ում ու ծանոթացել տիրող իրավիճակին: Քաջարանի պղնձամոլիբդենային գործարանի ղեկավարության հետ հանդիպման ժամանակ, նախարար Ղազարյանը շնորհակալություն է հայտնել նրանց կողմից կառուցված մարզահամալիրը մարզումների նպատակով մարզադպրոցին տրամադրելու համար և հույս հայտնել, որ մարզահամալիրն ավելի արդյունավետ կծառայի մարզաշխարհին:

Քաջարանում երեխաների համար կազմակերպված ամառային ճամբարներում Գաբրիել Ղազարյանը զրուցել է երեխաների և աշխատողների հետ:

Այցելությունների ավարտին նախարարն այցելել է 2014 թվականի երիտասարդական մայրաքաղաք հռչակված Սիսիան քաղաք և մասնակցել Երիտասարդության միջազգային օրվա կապակցությամբ իրականացվող երիտասարդական տոնական միջոցառմանը: