«Հրապարակ». Եզդի համայնքի կազմակերպած խաղաղ ցույցը վերածվել է քաշքշուկի. Ցեղասպանության 100-ամյակին ընդառաջ՝ անպատվաբեր պահվածք

Այս օրերին ողջ աշխարհի ուշադրության կենտրոնում են Հյուսիսային Իրաքում իսլամիստ արմատական զինյալների ոճրագործությունները, նրանց կողմից հարձակման ենթարկված ու տեղահանված եզդիները: Համացանցում տարածվել են սովալլուկ ու տանջահար երեխաների, խոշտանգված փախստականների սահմռկեցուցիչ լուսանկարներ ու տեսանյութեր: Իսլամիստ ծայրահեղականները կտտանքների են ենթարկում նրանց, անգամ փաստեր կան կենդանի թաղումների մասին: Իսլամիստ ծայրահեղականների կողմից իրականացվող ցեղասպանությունը ոտքի է կանգնեցրել աշխարհի եզդիներին, նրանք պահանջում են պետություններին՝ հանդես գալ հայտարարություններով: Իրաքում բնակվող եզդիների բնաջնջման մասին հայտարարությամբ է հանդես եկել ԱՄՆ նախագահ Բարաք Օբաման՝ տեղի ունեցածը որակելով ցեղասպանություն: Գրում է «Հրապարակ»-ը:

Եզդիների ցեղասպանության վերաբերյալ հայտարարություն անելու պահանջով երեկ ՀՀ կառավարության դուռն էին գնացել նաեւ Հայաստանում բնակվող եզդիները, սակայն վարչապետ Հովիկ Աբրահամյանը հետաքրքրված չէ համամարդկային այս խնդրով: Մերժեց հանդիպել նրանց՝ այդպիսով բորբոքելով խաղաղ ակցիան, որը վերածվեց եզդիների ու ոստիկանների միջեւ սկանդալի, հրմշտոցի: Եզդի համայնքի մի շարք ներկայացուցիչներ կառավարության շենքի դիմաց պահանջում էին ՀՀ իշխանություններից՝ ՄԱԿ-ի Գլխավոր ասամբլեայում բարձրացնել Իրաքում ոչնչացվող քրիստոնյաների ու էթնիկ փոքրամասնությունների, այդ թվում նաեւ եզդիների հարցը: Եզդի համայնքի ներկայացուցիչները շուրջ 2 ժամ սպասեցին Հովիկ Աբրահամյանին, սակայն վարչապետն այդպես էլ հարկ չհամարեց իջնել ներքեւ: Պարբերաբար ներքեւ էր իջնում մի փողկապավոր միջնորդ ու հորդորում մի քանի հոգով բարձրանալ վերեւ, բայց ոչ թե վարչապետի հետ հանդիպման, այլ որեւէ պաշտոնատար անձի: Հանդիպման այս ձեւաչափը վրդովվեցրեց ակցիայի մասնակիցներին, եւ նրանք ավելի վճռական պահանջեցին Արգամիչին վար իջնել: Միջնորդը նորից վերուվար արեց ու բողոքավորներին փոխանցեց, որ նման հարցերը ներքեւում չեն լուծվում, ինչ-որ մեկի հետ հանդիպումը միայն վերեւում է հնարավոր, բայց դարձյալ զգուշացրեց՝ ոչ Արգամիչի հետ:

Այս արհամարհանքը բորբոքեց խաղաղ ակցիայի մասնակիցներին, ովքեր, անտանելի շոգից ու վարչապետի արհամարհանքից զայրացած, սպառնացին փակել ճանապարհը: Բայց սա էլ կառավարության ղեկավարի որոշման վրա չազդեց: Բորբոքված ցուցարարները բղավոցներով ու սուլոցներով նետվեցին դեպի Տիգրան Մեծ փողոց՝ փակելով ճանապարհը, մեկը նստեց, մեկը պառկեց մեքենաների դեմ՝ կաթվածահար անելով երթեւեկությունը, բողոքի մասնակիցների քանակը կրկնապատկվեց, ոստիկանները բազմապատկվեցին, եւ կողմերի միջեւ բախումը մոտ էր, ինչը կառավարության աշխատակիցների համար թամաշայի լավ հնարավորություն էր՝ նրանք դուրս էին թափվել պատշգամբներից, դռներից ու լուսամուտներից եւ վերեւից հետեւում էին ոստիկանների ու ցուցարարների բախումներին: Ոչ մի հորդորով հնարավոր չեղավ ետ կանգնեցնել ցուցարարներին, համազգեստավորները երկու կողմից շղթայեցին նրանց՝ նեղացնելով բողոքողների օղակը, ինչը ճանապարհ բացեց երթեւեկության համար: Քիչ էր մնում եզդի ցուցարար մանուկները, որ ձեռքներին պարզել էին իրենց ազգակիցների սպանդի մասին վկայող պաստառներ, վրաերթի ենթարկվեին: 

Շարունակությունը` «Հրապարակ»-ի այսօրվա համարում: