«Վիետնամի հետ խաղացած ոչ-ոքին տարօրինակ էր». Աշոտ Նադանյան

Շախմատի Հայաստանի հավաքականի ոչ այնքան հաջող ելույթները կարող են կապված լինել նախապատրաստական շրջանի հետ: «Արմենպրես»-ի հետ զրույցում նման կարծիք հայտնեց ՀՀ վաստակավոր մարզիչ, միջազգային կարգի գրոսմայստեր Աշոտ Նադանյանը:

Վերջինիս խոսքով, շախմատի հավաքականից միշտ էլ լավագույն արդյունքներն են ակնկալվում: «Եթե նայենք վարկանիշով, ապա ավելի տարօրինակ եմ համարում Վիետնամի հետ խաղացած ոչ-ոքին: Սա շախմատ է, և եթե լավ մարզավիճակում ես, կարող ես պարտվել ամեն մեկին: Դիմացինն էլ, զգալով դա, ավելի մեծ եռանդով է խաղում քո դեմ»,-փաստեց Նադանյանը:

Շախմատիստի կարծիքով, Հայաստանում միշտ էլ եղել են աչքի ընկնող և տաղանդավոր երիտասարդ շախմատիստներ: «Երիտասարդներըը կարող են ապացուցել, որ ավելի ուժեղ են և օգուտ կբերեն թիմի: Հայաստանում այդ հարցում ժողովրդավարություն է, և մենք բացառիկ երկրներից ենք, որ երկրի չեմպիոնը դառնում է թիմի անդամ: Սակայն անիմաստ եմ գտնում, որ թիմում արհեստական փոփոխություն են կատարում»,-եզրափակեց նա:

41-րդ շախմատային Օլիմպիադան այս անգամ կայացավ Նորվեգիայում: Հայաստանի հավաքականը 11 տուրից 6-ն ավարտեց հաղթանակով, 4-ն ավարտեց ոչ-ոքի, իսկ մեկում պարտվեց: Հայաստանի հավաքականն ընդհանուր հաշվարկով զբաղեցրեց 8-րդ հորիզոնականը: Օլիմպիադայի նոր չեմպիոնը Չինաստանի հավաքականն է: