«Պատժամիջոցներն ազդեցություն չեն ունենա «Սուխոյ Սուպերջեթ-100» ինքնաթիռների արտադրության վրա». Միխայիլ Պողոսյան

Հասարակություն 16 Օգոստոս, 2014 20:59

ԵՄ-ի և ԱՄՆ-ի կողմից Ռուսաստանի նկատմամբ կիրառվող պատժամիջոցներն անմիջական ազդեցություն չեն ունենա «Սուխոյ» ընկերության «Սուպերջեթ-100» ինքնաթիռների արտադրության ծրագրերի վրա: Ընկերությունը նախատեսում է ընդլայնել ինքնաթիռների արտադրությունը Գագարինի անվան ավիացիոն գործարանում:

Այդ մասին «ԻՏԱՌ-ՏԱՍՍ»-ի հետ զրույցում տեղեկացրել է Միավորված ավիաշինարարական կորպորացիայի գլխավոր տնօրեն Միխայիլ Պողոսյանը: «Ասել, որ այդ պատժամիջոցները ոչ մի կերպ ազդեցություն չեն ունենա ինքնաթիռային շինարարության ծրագրերում, ես չեմ կարող: Իհարկե, սահմանափակումների պայմաններում արտասահմանյան շուկաներում որոշակի դժվարություններ կառաջանան: Բայց սա անուղղակի, այլ ոչ թե ուղղակի ազդեցություն կլինի»,- «Արմենպրես»-ի հաղորդմամբ` ասել է Միխայիլ Պողոսյանը:

«Սուխոյ Սուպերջեթ-100»-ի ծրագրով մենք ունենք լայն միջազգային կոոպերացիա, որն ունի կայուն երկարաժամկետ բնույթ: Ոչ մի պատճառ չկա կանխատեսել ինչ-որ անհաջողություններ և գործընկերների կողմից որևէ խնդիր չունենք»,- ընդգծել է նա: Միխայիլ Պողոսյանի խոսքով` նախորդ տարի ընկերությունում հավաքվել է 25 Սուպերջեթ, այս տարի կարտադրվի 40, իսկ հաջորդ տարի` արդեն 50 ինքնաթիռ: «Մենք մտադիր ենք ընդլայնել ինքնաթիռների արտադրությունը»,- ասել է ընկերության գլխավոր տնօրենը:

«Սուխոյ Սուպերջեթ-100»-ը միջին մարդատար ինքնաթիռ է: Մինչ այժմ արտադրվել է 68 ինքնաթիռ, որոնցից 7-ը նախատեսվբած է եղել փորձարկումների համար, 41-ը վաճառվել է: