Ադրբեջանի իշխանությունը հայտնվել է ծիծաղելի վիճակում

Ադրբեջանի իշխանությունը սկսել է անհանգստանալ իր վարած ռեպրեսիվ քաղաքականության նկատմամբ միջազգային հզոր հակազդեցության առնչությամբ: Ինչպես հաղորդում է «Արմենպրես»-ը, ներիշխանական աղբյուրներից «Ազադլըգ»-ին հայտնի է դարձել, որ ադրբեջանական իշխանությունները լուրջ ջանքեր են գործադրում իրավապաշտպանների ձերբակալությունների հետ կապված միջազգային այդ կոշտ արձագանքներ ը չեզոքացնելու համար:

«Վերջին ձերբակալությունների հետ կապված իշխանությունը միջազգային հանրությունից նման լուրջ բողոք չէր սպասում: Դա կապված էր աշխարհաքաղաքական իրավիճակի հետ: Իշխանությունը մտածում էր, որ Արեւմուտքի հետ Ռուսաստանի միջեւ դիմակայության ֆոնին էներգակիրների պատճառով Ադրբեջանը կարեւոր գործոնի էր վերածվել, եւ, օգտվելով այդ իրավիճակից, կարող է հանգիստ կերպով մաքրումներ սկսել երկրի ներսում: Սակայն, հանդիպեց միանգամայն հակառակ վերաբերմունքի: Այժմ կառավարությունը լրջորեն անհանգստացած է, եւ իրավիճակից դուրս գալու համար գործի է դրել իր բոլոր միջազգային կապերը», -հայտնել է թերթի աղբյուրը:

Նշվում է, որ ստեղծված իրավիճակից շփոթված իշխանությունն իրավապաշտպանների ձերբակալությունների հետ կապված միջազգային մամուլի հրապարակումների դեմ գործողություններում հայտնվել է ծիծաղելի վիճակում:

Թերթը, որպես օրինակ, նշում է, որ իրավապաշտպաններ Լեյլա եւ Արիֆ Յունուսների ձերբակալության առնչությամբ The Washington Post թերթում հրապարակված խիստ քննադատական հոդվածին տված պատասխանում ԱՄՆ-ում Ադրբեջանի դեսպան Էլին Սուլեյմանովը գրել է, թե «եթե Յունուսները հետաքննությունից չխուսափեին, ապա հնարավոր է, որ նրանք չձերբակալվեին»:

«Լեյլա եւ Արիֆ Յունուսների դեմ իշխանությունը 9 հոդվածներից բաղկացած մեղադրանք է առաջադրել: Եթե իշխանությունը նրանց ձերբակալելու նպատակ չուներ, ապա ինչու է այդ մարդկանց մեղադրում ծանր հանցագործությունների մեջ: Իշխանությունները նրանց ձերբակալել են ոչ թե հետաքննությունից խուսափելու համար, քանի որ Լեյլա Յունուսը միայն հայտարարել է, որ ինքը կգնա հարցաքննության, եթե իշխանությունները վերադարձնեն իրենից առգրաված անձնագիրը…Կարելի է վստահաբար ասել, որ միջազգային մամուլում իշխանությունների հետագա ելու յթները եւս հիմնված կլինեն նման ծիծաղելի փաստարկների վրա: Իսկ դա ոչ թե իրավիճակից դուրս գալ, այլ այն ավելի ծանրացնել է նշանակում», -գրում է «Ազադլըգ»-ը: