«Բազե-2014»-ում ամենաինտելեկտուալը նարնջագույն ճակատն է (լուսանկար)

«Բազե-2014» համահայկական երիտասարդական հավաքում օգոստոսի 19-ին որոշվել է ամենաինտելեկտուալ ճակատը. «Բրեյն ռինգ» մրցույթում, որն անցկացրել է Գիտակների հայկական ասոցիացիայի ղեկավար Տիգրան Քոչարյանը, հաղթել է նարնջագույն ճակատը։ Տեղի է ունեցել նաև նկարչության ներճակատային մրցույթը։ Մասնակիցներին տրված է եղել երկու ժա մ՝ ավարտուն նկար ներկայացնելու համար։ Մրցույթի ժյուրիի նախագահ, Հայաստանի նկարիչների միության նախագահ Կարեն Աղամյանը, ամփոփելով մրցույթի արդյունքները, նկատել է, որ շատ դժվար է անգամ պրոֆեսիոնալ նկարչի համար տվյալ ժամանակում ավարտուն գործ ներկայացնել, մինչդեռ այդ խնդիրը երիտասարդ բազեականները հաջողությամբ կատարեցին, ընդ որում, կտավներում կրկնություն չկա. յուրաքանչյուր նկարում արտահայտված է հեղինակի ներքին աշխարհը։ Ժյուրիի անդամները խոստովանել են, որ մեծ դժվարությամբ են կատարել նկարների ընտրությունը և որոշել հաղթողներին։ Հետաքրքիր է այն, որ նկարչական ձիրքով աչքի են ընկել տարբեր մասնագիտություններ ունեցող երիտասարդները՝ ապագա լեզվաբանները, դիվանագետները, երաժիշտները։

«Բազե» հավաքի շրջանակներում այսօր՝ օգոստոսի 19-ին, շարունակվում են պարանի ձգման, հրաձգության, պարի մրցույթները, իսկ երեկոյան սպասվում են ռազմարվեստի դասընթացներ և ազգային պարերի ուսուցում։