Սերժ Սարգսյանը խոսում է ֆեոդալական, գյուղական ընտանիքի մոդելի մասին. Արման Գրիգորյան

Մենք հավատում ենք, որ մեր ազգային գոյությունը երաշխավորող հիմանական և ամենաամուր միջնաբերդը ընտանիքն է, մեր ավանդական և պահպանողական ընտանիքը, որտեղ երիտասարդները հարգում և լսում են ավագին, որի հենասյունն է կինը և մայրը: Այդ մասին այսօր ՀՀԿ 13-րդ համագումարում ասել է Սերժ Սարգսյանը։ 

Լուրեր.com-ի հետ զրույցում մեկնաբանելով այս միտքն, արվեստագետ Արման Գրիգորյանն ասաց. «Իր ասած ավանդական ընտանիքը գյուղական ընտանիքն է՝ հողագործական աշխարհի, մինչարդյունաբերական ընտանիքն է, որը բնականաբար այսօր գոյություն չունի: Դեռ Սովետական Միության ժամանակ արդեն ոչ թե սովետական միության, այլ՝ մոդեռնիստական նախագիծ էր, նուկլեար ընտանիքի մոդելն էր: Ուղղակի այդ խոսքերը՝ նմանատիպ ընտանիքի մասին, հիմնականում օգտագործվում է իբրև գովազդ, որը նայելիս կամ լսելիս՝ մարդիկ մտածում են, որ հերոսներ են նրանք, որոնք կկարողանան պահպանել այդ տիպի ընտանիքը, բայց ի՛նքը չի պատրաստվում անել այդ: Ոչ մեկն էլ չի պատրաստվի այդ տեսակ ընտանիքը պահպանել, որովհետև այն աշխատանքի պաշտամունքի, մարդու շահագործման վրա է հիմնված: Նույնիսկ այսօր նուկլեար ընտանիքը, այսինքն՝ սիրո վրա հիմնված ընտանիքը դժվարություններ ունի: Պետք է նոր մոդելների մասին մտածել, որովհետև մենք ապրում ենք հետարդյունաբերական աշխարհում։ Այս աշխարհում խոսել պահպանողական ընտանիքի կամ մինչարդյունաբերական ընտանիքի մասին՝ ընդմենը գովազդի պես մի բան է, որը հաճախ արդյունավետ չէ, վանող է: Մարդիկ խուսափում են նման ընտանիքներ կազմել:

-Սերժ Սարգսյանն ասում է՝ ազգային գոյությունը երաշխավորող հիմնական ու ամենաամուր միջնաբերդը ընտանիքն է, իսկ ձեր պատկերացմամբ՝ այդ գոյությունը երաշխավորող հիմնական ու ամենաամուր միջնաբերդը ո՞րն է: 

-Իր խոսքերը դատարկ խոսքեր են, ոչինչ չասող խոսքեր են, որովհետև ընտանիքի մոդելը, որի մասին ինքը խոսում է, ֆեոդալական, գյուղական ընտանիքի մոդելն է: Ի՞նչ կապ ունի այն այսօրվա աշխարհի հետ: Քաղաքացիական հասարակության գոյության երաշխավորը Սահմանադրությունն ու քաղաքացիներն են։ Քաղաքացիական հասարակությունը, քաղաքացին է ազգային պետության գոյության երաշխավորը, ոչ թե ընտանիքը։ Ի՞նչ կապ ունի ընտանիքի մոդելը։ Բազմաթիվ մոդելներ կարող են լինել։