Ծննդավայրից հեռու ապրող արցախցիներն այս տարի ավելի շատ են այցելել Արցախ

Ծննդավայրից հեռու ապրող արցախցիների մեծ հոսք է այս տարի գրանցվել դեպի Արցախ, ովքեր՝ որպես զբոսաշրջիկներ, եկել և որոշ ժամանակ մնացել են իրենց հարազատների մոտ: Այս մասին Ստեփանակերտում լրագրողների հետ հանդիպմանը հայտնեց ԼՂՀ մշակույթի նախարար Նարինե Աղաբալյանը: «Այս տարի նկատելի է, որ մեծացել է դրսում ապրող այն արցախցիների թիվը, ովքեր գալիս են այստեղ հանգստանալու: Մյուս տարիների հետ համեմատությամբ ա յս տարի նրանց թիվը կտրուկ աճել է, և դա նկատելի է»,- «Արմենպրես»-ի հաղորդմամբ, ասաց նախարարը:

Միևնույն ժամանակ, այս տարի Արցախում բազմաթիվ երիտասարդական ճամբարներ են կազմակերպվել, որոնց մասնակցել են նաև մեծ թվով սփյուռքահայեր: «Այդ ճամբարները դեռևս գործում են: Առաջիկայում մենք կամփոփենք արդյունքները և նոր միայն կկարողանանք հստակ թվեր նշել, թե քանի հոգի է եղել ճամբարներում»,- նշեց Աղաբալյանը:

Ինչ վերաբերում է օտարեկրացի զբոսաշրջիկներին, նրանց թիվը նվազել է: ԼՂՀ մշակույթի նախարարը նշեց, որ այս տարի նկատվում է որոշակի նվազում՝ մյուս տարիների հետ համեմատած: