Ադրբեջանում հրեաների թիվն արագորեն նվազում է

Ադրբեջանում լեռնցի հրեաների միջազգային բարեգործական հիմնադրամի բաժանմունքի ղեկավար Սեմյոն Իխիիլովը կազմակերպության ազգագրական ծրագրի շրջանակում հանրապետության շրջաններ կատարած այցից հետո հայտարարել է, որ Ադրբեջանի տարածքում բնակվող հրեաների թիվն արագորեն նվազում է:

Ինչպես հաղորդում է «Արմենպրես»-ը՝ վկայակոչելով ադրբեջանական ԶԼՄ-ները, Իխիիլովն այցելել է Ադրբեջանի հարավային՝ Լենքորանի, Մասալլըի, Ջալիլաբադի և Լերիքի, կենտրոնական՝ Շամախիի և հյուսիսային՝ Օղուզի ու Գուբայի շրջաններ, որտեղ ավանդաբար բնակվել են հրեաները:

«Ադրբեջանի հարավում նախկինում բնակվում էին մի քանի հրեական համայնքներ, սակայն ներկայում Մասալլըում և Լերիքում ոչ մի հրեա չի մնացել, իսկ Լենքորանում բնակվում են ընդամենը երեք տարեց հրեաներ», -ցավով հայտնել է նա Հրեական նորությունների գործակալությանը:

Ջալիլաբադ քաղաքից ոչ հեռու գտնվող Պրիվոլնոյե գյուղում նախկինում բնակվում էր սուբբոտնիկների մեծ համայնք (նրանց անվանում էին գերաներ)՝ էթնիկ ռուսներ, որոնք հուդայականություն էին դավանում:

«Այժմ Պրիվոլնոյե գյուղում մնացել են ընդամենը 6 սուբբոտնիկներ: Դրանք ամբողջ կյանքում Պրիվոլնոյում բնակված տարեց մարդիկ են: Զառամյալ հասակը և այլ խնդիրներ նկատելիորեն բարդացրել են այդ մարդկանց կյանքը, որոնք հետևում են սուրբ Թորայի պատվիրաններին: Տխուր տպավորություն է թողել նաև Շամախին. այստեղ հրեական համայնքը կազմված է ընդամենը մեկ մարդուց: Օղուզում մնացել են 70 տարեց հրեաներ», -նշել է Իխիիլովը: