Հերթական անգամ ապացուցվեց, որ եթե պատերազմը սկսվի, Ադրբեջանը տանուլ կտա. Կոմանդոս

Արցախի հերոս, գեներալ-մայոր Արկադի Տեր-Թադևոսյանը (Կոմանդոս) լրագրողների հետ հանդիպման էր եկել քարտեզով: Քարտեզում պատկերված էին Հայաստանը, Արցախը և Ադրբեջանը: «Արմենպրես»-ի փոխանցմամբ' Կոմանդոսը ներկայացնում է, որ քարտեզի ողջ երկայնքով կանգնած են երկու երկրների զինակոչիկները: «Երկու կողմում էլ կանգնած են 18-20 տարեկան զինակոչիկներ, և նրանք երկուսն էլ պաշտպանում են իրենց հայրենիքը, սակայն մեկ տարբերությամբ' սահմանին կանգնած հայ զինվորը պաշտպանում է իր հայրենիք, մինչդեռ հակառակ կողմի զինվորը երբեմն չի հասկանում, թե ինչն է պաշտպանում, քանի որ Ադրբեջանը միատարր չէ, իսկ ազգային բոլոր փոքրամասնությունները ենթարկվում են սարսափելի ճնշումների և խոշտանգումների»,- ասում է Կոմանդոսը:

Արցախի հերոսի գնահատմամբ՝ սահմանին լարվածության բարձրացումն Ալիևի կողմից արհեստական կերպով է արվում: Այդ կերպ, Ադրբեջանը ցանկանում է ցույց տալ, թե իբր իր երկրում բարոյահոգեբանական վիճակը, հայրենասիրությունը բարձր մակարդակի վրա է: «Ալիևը փորձում է ինքն իրեն համոզել, որ իր զինվորները ցանկանում են և կարող են պատերազմել»,- ասաց Կոմանդոսը' հավելելով, որ դիրքային առումով Հայաստանը շատ ավելի լավ վիճակում է և արհեստական լարվածությունից խուսափելու համար Արցախի հերոսն առաջարկում է լինել նախաձեռնող ու հասցնել առաջին հարվածը:

«Ես զինվորական եմ, ինչու պետք է ինձ նախազգուշացնեն պատերազմով, իսկ մենք' ոչ, այն պարագայում, երբ հայ զինվորականները շատ լավ տիրապետում են իրենց ու թշնամու ուժերին և հնարավորությունների: Ես չեմ ասում պատերազմի վերսկսում, սակայն թշնամին պետք է հասկանա, որ մենք միայն պատասխանողի դերում չենք: Պետք է լինել ավելի ակտիվ, որպեսզի թշնամին չհամարձակվի ակտիվանալ և սահմանային լարվածությունը մեծացնել»,- ասում է Կոմանդոսը' հավելելով, որ այս պարագայում կոնկրետ կետերի և կոնկրետ դիրքերի ուղղությամբ պետք է լինել հարձակողական:

Նրա խոսքով՝ վերջին իրադարձությունները փաստեցին, որ Ալիևի խորհրդականներն այնքան էլ գրագետ չեն ռազմական գործի հարցում և հերթական անգամ ապացուցվեց, որ նրանք ռազմարվեստի առումով գրեթե ոչինչ չեն հասկանում, և եթե պատերազմը սկսվի, նրանք տանուլ կտան:

Այս պարագայում, ըստ Կոմանդոսի, միջազգային հանրությունը չի կարող Հայաստանին մեղադրել ագրեսիայի մեջ, քանի որ հրադադարի կնքումից հետո տարիներ շարունակ Ադրբեջանը խախտում է զինադադարի համաձայնագիրը, սակայն միջազգային կազմակերպությունները, ԵԱՀԿ-ն միշտ համահարթեցման քաղաքականություն են իրականացնում և կողմերին կոչ անում չխախտել կրակի դադարեցման ռեժիմը: