Արմեն Աշոտյանը զարմացել է, որ բազմաթիվ դպրոցականներ բացի սովորելուց նաև աշխատում են

ՀՀ ԿԳ նախարար Արմեն Աշոտյանը չի կարող սոցիալապես անապահով մարդկանց ապահովել միջոցներով, որովհետև իր ֆինանսական միջոցները բացառապես աշխատավարձային են: Այս մասին օգոստոսի 27-ին հանրապետության ավագ դպրոցների տնօրենների և մանկավարժների օգոստոսյան խորհրդակցության ավարտին, պատասխանելով լրագրողների հարցերին, նշեց ինքը' նախարարը: Աշոտյանը զարմացել էր այն փաստից, որ շատ դպրոցների աշակերտներ և՛ աշխատում են, և՛ սովորում:

«Ես ցանկանում եմ նրանց հետ հանդիպել և հասկանալ, թե ինչպես են աշխատում, ինչ հոգսեր ունեն, հասկանալու իրենց մտահոգող խնդիրները և ինչպես անել, որ դա չազդի իրենց կրթության վրա: Զարմացա, որովհետև լրատվամիջոցներն են հաճախ գրում, որ Հայաստանում կա մեծ գործազրկություն, և այդ մեծ գործազրկության պարագայում ինչու՞ են երեխաներն աշխատում: Ուզում եմ նաև դա հասկանալ»,- «Արմենպրես»-ի փոխանցմամբ, նշեց Արմեն Աշոտյանը:

Աշոտյանի խոսքով՝ ինքը միացել է «Սառցե դույլ» ֆլեշմոբին հենց այդ խնդրի վրա ուշադրություն սևեռելու նպատակով: «Շնորհակալ եմ, որ բազմաթիվ մարդիկ ինձ գրեցին և զանգահարեցին և հիմա նույնիսկ արշավ են սկսել նման երեխաներին գրենական պիտույքներով ապահովելու համար»,- նշեց նախարարը:

ՀՀ ԿԳ նախարարն օգոստոսի 27-ին մասնակցեց հանրապետության ավագ դպրոցների տնօրենների և մանկավարժների օգոստոսյան խորհրդակցությանը: Նախարարը զրուցեց խորհրդակցության մասնակիցների հետ, պատասխանեց նրանց հարցերին: