Արցախյան ազատամարտի մասին պատմող «Թևանիկ» ֆիլմը կցուցադրվի Բեյրութում և Նիկոսիայում

Արցախյան ազատամարտի մասին, հայ-լիտվական համատեղ արտադրության, «Ոսկե ծիրան» 11-րդ միջազգային կինոփառատոնի «Հայկական համայնապատկեր. խաղարկային» մրցույթում հաղթող ճանաչված «Թևանիկ» ֆիլմը կցուցադրվի մի շարք երկրներում: Այս մասին «Արմենպրես»-ի հետ զրույցում տեղեկացրեց ֆիլմի ռեժիսոր Ջիվան Ավետիսյանը:

«Ֆիլմը սեպտեմբերի 2-ին կներկայացվի Բեյրութում, իսկ 3-ին Նիկոսիայում: Բացի այդ, նախատեսում եմ այն ներկայացնել նաև Վանաձորում: Ցուցադրությունները կազմակերպվում են հայ համայնքների հրավերով: Ես ներկա եմ լինելու ֆիլմի ցուցադրություններին: Շատ ոգևորված եմ և հուսով, որ նրանք կսիրեն իմ ֆիլմը»,- նշեց Ջիվան Ավետիսյանը:

Բացի այդ, կինոնկարը նորից կհայտնվի Երևանի «Մոսկվա» կինոթատրոնի էկրանին: «Կինոնկարը հնարավոր կլինի դիտել սեպտեմբերի 22-ից՝ օրական երկու ցուցադրությամբ»,- հայտնեց նա:

«Թևանիկը» մայիսի 6-ից ցուցադրվել է կինոթատրոններում: Այն պատմություն է երեք պատանիների մասին, ովքեր բնավ չեն պատկերացնում, թե ինչ է պատերազմը: Ֆիլմը ներկայացնում է արցախյան ազատամարտի տարիները, մասնավորապես, սկզբնական շրջանը, երբ պատերազմի վտանգն էր դեռ կախված մարդկանց գլխին, և մարդիկ ամբողջությամբ պատերազմի մեջ չէին: Կինոնկարը պատմում է 14 տարեկան երեք պատանու մասին, ովքեր ևս, մեծահասակների պես, բնավ չեն պատկերացնում, թե ինչ է պատերազմը: Անկախ իրենց կամքից' նրանք պատերազմի դաժան դրոշմը կրում են իրենց վրա' տարբեր կերպ: Պատերազմ է՝ պատերազմ, որի մասին իրենք էլ պատկերացում չունեն և չեն էլ հասցնում ըմբռնել' ինչ է դա: Պատերազմի դաժանությունը վերջ է դնում շատերի կյանքին:

Ֆիլմի նկարահանումների իրականացմանն աջակցել է ԼՂՀ կառավարությունը: Այն արտադրել է «Ֆիշ այ Արթ» մշակութային հիմնադրամը' Հայաստանի ազգային կինոկենտրոնի և լիտվական «Արտբոքս» կինոընկերության հետ համատեղ: Կինոնկարը ներկայացվել է Կաննի 67-րդ փառատոնի կինոշուկայում: