ԿԽՄԿ-ն չի հստակեցնում ադրբեջանցի դիվերսանտներին հանդիպելու ժամկետները

Կարմիր խաչի միջազգային կոմիտեի կողմից Արցախում պահվող երկու ադրբեջանցի դիվերսանտների հետ հանդիպման նախապատրաստումն աշխատանքային գործընթացի մաս է, որը պարբերական բնույթ է կրելու: Այս մասին հայտնեց Կարմիր խաչի միջազգային կոմիտեի երևանյան գրասենյակի ներկայացուցիչ Հասմիկ Գալստյանը «Արմենպրես»-ի հետ զրույցում: «Հանդիպման նախապատրաստումը ստաբիլ աշխատանքային գործընթաց է, քանի որ նրանց արդեն հանդիպել են Կարմիր խաչի ներկայացուցիչները, դա պարբերական բնույթ է կրելու այսուհետ»,- ասաց Հասմիկ Գալստյանը: Հարցին ի պատասխան, թե ինչ ժամկետներում է նախատեսվում հաջորդ հանդիպումը, ԿԽՄԿ երևանյան գրասենյակի ներկայացուցիչն ասաց. «Մենք, սովորաբար, այս դեպքն էլ բացառություն չէ, մեր պլանավորելիք գործողությունների մասին որևէ տեղեկություն չենք հրապարակում, ինֆորմացիան տալիս ենք, երբ ինչ-որ քայլեր կատարված են լինում»:

Ադրբեջանական լրատվամիջոցներից մեկը, վկայակոչելով ԿԽՄԿ-ի Բաքվի գրասենյակը, հայտնել էր, որ նախատեսվում է այց' չհստակեցնելով սակայն ինչ ժամկետներում:

Օգոստոսի 11-ին Կարմիր խաչի միջազգային կոմիտեի' Լեռնային Ղարաբաղի առաքելության ներկայացուցիչներն այցելել են Ստեփանակերտում ձերբակալված ադրբեջանցի երկու դիվերսանտներին' Շահբազ Գուլիեւին եւ Դիլհամ Ասկերովին: Հանդիպման ավարտին Ադրբեջանի քաղաքացիները նամակ են փոխանցել ԿԽՄԿ ներկայացուցչին, որն էլ այն կփոխանցի Բաքվի իր գործընկերներին:

Քարվաճառում հուլիսի 14-ի ժամը 13:00-ի դրությամբ, ավարտվել է ՊԲ հատուկ նշանակության ստորաբաժանումների կողմից իրականացվող գործողությունը ադրբեջանական դիվերսիոն-հետախուզական խմբի վնասազերծման ուղղությամբ: Արդյունքում դիվերսիոն խմբի երկու անդամ ձերբակալվել են, մեկը' վնասազերծվել: